చిదంబరం కస్టడీ ఇప్పుడు అవసరం లేదు:ఈడీ

ఐఎన్​ఎక్స్​ మీడియా కేసులో ఈడీ ముందు లొంగిపోయేందుకు అనుమతించాలని కేంద్ర మాజీ మంత్రి పి.చిదంబరం దిల్లీ కోర్టులో పిటిషన్​ దాఖలు చేశారు. అయితే ఈ వ్యాజ్యంపై తీర్పును రేపటికి వాయిదా వేసింది కోర్టు. చిదంబరాన్ని ప్రస్తుతం అదుపులోకి తీసుకోవాల్సిన అవసరం లేదని కోర్టుకు తెలిపింది ఈడీ.

ఐఎన్​ఎక్స్​ మీడియా మనీలాండరింగ్​ కేసులో ఎన్​ఫోర్స్​మెంట్​ డైరెక్టరేట్​ ముందు లొంగిపోయేందుకు అనుమతించాలని కేంద్ర మాజీ మంత్రి చిదంబరం దాఖలు చేసిన పిటిషన్​పై తీర్పును రేపటికి వాయిదా వేసింది దిల్లీ కోర్టు.

ప్రత్యేక న్యాయమూర్తి అజయ్​ కుమార్​ కుహార్​ నేతృత్వంలోని ధర్మాసనం చిదంబరం పిటిషన్​పై విచారణ చేపట్టింది.

కస్టడీ అవసరం లేదు..

ఐఎన్​ఎక్స్​ మీడియా మనీలాండరింగ్​ కేసులో ప్రస్తుతం చిదంబరం అరెస్ట్​ అవసరం ఉన్నప్పటికీ.. సరైన సమయంలోనే అదుపులోకి తీసుకుంటామని ధర్మాసనానికి తెలిపింది ఎన్​ఫోర్స్​మెంట్​ డైరెక్టరేట్​. కేంద్ర మాజీ మంత్రి ప్రస్తుతం సీబీఐ కస్టడీలో ఉన్నందున సాక్ష్యాధారాలను మార్చే అవకాశం లేదని అభిప్రాయపడ్డారు ఈడీ తరఫున వాదనలు వినిపించిన సొలిసిటర్​ జనరల్​ తుషార్​ మెహతా. చిదంబరం పిటిషన్​ను తిరస్కరించాలని కోరారు.

ప్రస్తుతం ఆయన్ని కస్టడీకి తీసుకోవాల్సిన అవసరం లేదని పేర్కొన్నారు మెహతా. నిందితుడు దర్యాప్తు సంస్థకు మార్గనిర్దేశం చేయలేడని, అదుపులోకి తీసుకోవాలనే ఉత్తర్వుల ద్వారా దర్యాప్తు సంస్థ విచక్షణను తగ్గింస్తుందని అభిప్రాయపడ్డారు.

ఇబ్బందులకు గురిచేసేందుకే..

ఈడీ వాదనలను తప్పపట్టారు చిదంబరం తరఫు న్యాయవాది కపిల్​ సిబల్​. ఆయన్ని ఇబ్బందులకు గురిచేసేందుకు దర్యాప్తు సంస్థ తప్పుదారిలో వెళుతోందని ఆరోపించారు. తాను కోరుకున్నప్పుడు ఈడీ ముందు లొంగిపోయే హక్కు చిదంబరానికి ఉందని పేర్కొన్నారు. ఆగస్టు 20, 21న రెండు రోజులు అరెస్ట్​ చేసేందుకు వెళ్లిన ఈడీ అధికారులు ఇప్పుడెందుకు అదుపులోకి తీసుకోవటాన్ని వద్దంటున్నారని ప్రశ్నించారు.

సీబీఐ కస్టడీలోనే...

ఐఎన్​ఎక్స్​ మీడియా కుంభకోణం అవినీతి ఆరోపణల కేసులో భాగంగా సీబీఐ కస్టడీలో ఉన్నారు చిదంబరం. 14 రోజుల కస్టడీలో భాగంగా తిహార్​ జైలుకు తరలించారు అధికారులు.

ఇదీ చూడండి: బెయిల్​ కోసం దిల్లీ హైకోర్టుకు చిదంబరం