నిర్భయ: న్యాయం కోసం ఈ నెల 18 వరకు ఆగాల్సిందేనా?

నిర్భయ కేసు దోషులను వెంటనే ఉరితీసేలా ఆదేశాలు జారీ చేయాలని కోరుతూ నిర్భయ తల్లిదండ్రులు దాఖలు చేసిన పిటిషన్ పై విచారణను ఈ నెల 18కి వాయిదా వేసింది దిల్లీ కోర్టు. మరోవైపు నిందితుల్లో ఒకడైన అక్షయ్​ కుమార్​ రివ్యూ పిటిషన్​ను వ్యతిరేకిస్తూ నిర్భయ తల్లి సుప్రీంను ఆశ్రయించారు.

సంచలనం సృష్టించిన నిర్భయ కేసులో దోషులకు వెంటనే డెత్​ వారెంట్లు జారీ చేయాలని కోరుతూ నిర్భయ తల్లిదండ్లులు దాఖలు చేసిన పిటిషన్​పై విచారణను దిల్లీ కోర్టు వాయిదా వేసింది. నిర్భయ దోషుల్లో ఒకడైన అక్షయ్ కుమార్​ సుప్రీంకోర్టులో దాఖలు చేసిన రివ్యూ పిటిషన్ డిసెంబర్ 17న విచారణకు రానుండటమే ఇందుకు కారణం.

"సుప్రీం కోర్టులో నిందుతుడి రివ్యూ పిటిషన్​ పెండింగ్​లో ఉన్నందున అప్పటివరకు వేచి చూడాలని నేను భావిస్తున్నా. అందుకే పిటిషన్​పై విచారణను ఈ నెల 18కి వాయిదా వేస్తున్నాను." - సతీశ్ కుమార్​ అరోడా, దిల్లీ పటియాలా హౌస్ కోర్టు జడ్జి

ఏడేళ్లుగా న్యాయం కోసం పోరాడుతున్నామని, మరో వారం రోజులు ఎదురుచూస్తామని.. వాయిదా వేసిన అనంతరం నిర్భయ తల్లి మీడియాతో అన్నారు.

సుప్రీం చెంతకు...

నిర్భయ కేసుపై 2017లో సుప్రీం ఇచ్చిన తీర్పుపై రివ్యూ కోరిన అక్షయ్​ కుమార్​ పిటిషన్​ను వ్యతిరేకిస్తూ నిర్భయ తల్లి సుప్రీంను ఆశ్రయించారు. ​ ఈ నెల 17న విచారణకు రానున్న నిందితుడి రివ్యూ పిటిషన్​ను వ్యతిరేకిస్తున్నట్లు.. సీజేఐ జస్టిస్​ ఎస్​ఏ బోబ్డే నేతృత్వంలోని ధర్మాసనానికి తెలిపారు.

అభ్యర్థనను అంగీకరించిన ధర్మాసనం నిందితుడి రివ్యూ పిటిషన్​తో పాటే.. నిర్భయ తల్లి అభ్యర్థన వ్యాజ్యాన్ని విచారిస్తామని స్పష్టం చేసింది.

• ఇదీ చూడండి: కోర్టు ఆవరణలోనే కామాంధుడికి దేహశుద్ధి!