ప్లాస్టిక్ భూతాన్ని తరిమేసేందుకు ఛత్తీస్గఢ్ అంబికాపుర్లో ప్రారంభించిన చెత్త కేఫ్.. ప్రపంచవ్యాప్తంగా ప్రశంసలు అందుకుంటోంది. ప్లాస్టిక్ వ్యర్థాలను సేకరించి, నగరాన్ని పరిశుభ్రంగా మార్చాలన్నది... ఈ కేఫ్ ఏర్పాటు వెనుక ఉద్దేశం.
అంబికాపుర్ నగరపాలక సంస్థ నిరాశ్రయుల కోసం దేశంలోనే తొలిసారిగా 'గార్బేజ్ కేఫ్' పథకాన్ని అమల్లోకి తెచ్చింది. ఒక కిలో ప్లాస్టిక్ వ్యర్థాన్ని తెచ్చిస్తే భోజనం, అరకిలో ప్లాస్టిక్ తెచ్చిస్తే అల్పాహారం పెడతారు.
రోడ్ల నిర్మాణానికి..
అక్టోబర్ 9న ప్రారంభమైన ఈ కేఫ్లో నోరూరించే ఆహారం అందిస్తున్నారు. రోజూ సుమారు 10 నుంచి 20 కిలోల ప్లాస్టిక్ వ్యర్థాలను సేకరిస్తున్నారు. వీటిని నగరపాలక సంస్థకు చెందిన సానిటరీ పార్క్ రీసైక్లింగ్ కేంద్రానికి పంపిస్తారు.
ఈ వ్యర్థాలను ఉపయోగించి నగరంలో రోడ్లు నిర్మించాలని లక్ష్యంగా పెట్టుకుంది అంబికాపుర్ నగరపాలక సంస్థ. ఈ కార్యక్రమంతో మహిళలకు ఉపాధి అవకాశాలు లభిస్తున్నాయి.
స్థానికుల ఆదరణ
ఈ కేఫ్ను ఈటీవీ భారత్ ప్రతినిధి బృందం సందర్శించినప్పుడు పరిసరాలు శుభ్రంగా కనిపించాయి. చిన్నారులు కూడా బాగానే వస్తున్నారు. ఈ గొప్ప ప్రయత్నంతో స్థానికుల్లోనూ ప్లాస్టిక్పై అవగాహన పెరుగుతోంది.
ఇదీ చూడండి: 'చెత్త కేఫ్' షురూ- కిలో ప్లాస్టిక్కు భోజనం, అరకిలోకు టిఫిన్
