'మహా' వర్షాలకు 2 రోజుల్లో 53 మంది బలి

మహారాష్ట్రలో వరుణుడి ప్రతాపానికి ఇప్పటి వరకు 53 మంది మరణించారు. మృతుల సంఖ్య మరింత పెరిగే అవకాశముంది. లోతట్టు ప్రాంతాల్లో ఎన్​డీఆర్​ఎఫ్​ బృందాలు సహాయక చర్యలు చేపడుతున్నాయి.​

కుండపోత వర్షాలకు మహారాష్ట్ర అతలాకుతలమవుతోంది. నాలుగు రోజులుగా ఎడతెరిపి లేకుండా కురుస్తున్న వర్షాలకు 53 మంది ప్రాణాలు కోల్పోయారు. అనేక ప్రాంతాలు నీట మునిగాయి. రాష్ట్రంలో ఈ రోజూ భారీ వర్షాలు కురుస్తాయన్న వార్తలు ప్రజల గుండెల్లో గుబులు రేపుతున్నాయి.

అర్ధరాత్రి విషాదం...

భారీ వర్షాలకు రాష్ట్రంలోని నదులు ఉద్ధృతంగా ప్రవహిస్తున్నాయి. రత్నగిరి జిల్లా తివారేలోని డ్యామ్​కు గండి పడి 11 మంది మృతి చెందారు. మరో 20 మంది గల్లంతయ్యారు. అర్ధరాత్రి ఈ ఘటన చోటుచేసుకుంది. 12-15 ఇళ్లు కొట్టుకుపోయాయి. మృతుల సంఖ్య మరింత పెరిగే అవకాశముంది.

మలాడ్​లో 24...

ముంబయి తూర్పు మలాడ్​​ ప్రాంతం వద్ద మంగళవారం గోడ కూలిన ఘటనలో మృతుల సంఖ్య 24కి చేరింది. 70 మందికి పైగా క్షతగాత్రులయ్యారు. పుణెలో కళాశాల గోడ కూలి.. ఆరుగురు కార్మికులు మరణించారు. ఠానే జిల్లాలోని కల్యాణ్​లో భారీ వర్షాలకు ముగ్గురు మృతిచెందారు.

జాతీయ విపత్తు నిర్వహణ దళం(ఎన్డీఆర్​ఎఫ్​) సహాయక చర్యలు చేపడుతోంది. ముఖ్యమంత్రి దేవేంద్ర ఫడణవీస్​ వరదల పరిస్థితిని ఎప్పటికప్పుడు సమీక్షిస్తున్నారు.

ఇదీ చూడండి:-

• మహారాష్ట్రలో డ్యామ్​కు గండి.. ఆరుగురు మృతి
• జలదిగ్బంధంలోనే ముంబయి మహానగరం...