సీడబ్ల్యూసీ భేటీ.. రాహుల్​ రాజీనామాపై ఉత్కంఠ

సార్వత్రిక ఎన్నికల్లో ఎన్​డీఏ చేతిలో తీవ్ర పరాభవం చవిచూసిన కాంగ్రెస్​.. తదుపరి కార్యచరణపై దృష్టి సారించింది. ఇందులో భాగంగా దిల్లీలో పార్టీ సీనియర్​ నేతలతో కూడిన సీడబ్ల్యూసీ సమావేశమైంది.  కాంగ్రెస్​ భవితవ్యంపై నేతలు చర్చిస్తున్నారు.

దిల్లీలో కాంగ్రెస్​ వర్కింగ్​ కమిటీ(సీడబ్ల్యూసీ) సమావేశం ప్రారంభమైంది. యూపీఏ ఛైర్​పర్సన్​ సోనియా గాంధీ, మాజీ ప్రధాని మన్మోహన్​ సింగ్​, గులాం​ నబీ ఆజాద్​, మల్లికార్జున ఖర్గే సహా పార్టీ సీనియర్​ నేతలు హాజరయ్యారు.

సార్వత్రిక ఎన్నికల్లో కాంగ్రెస్​ పార్టీకి ఊహించని పరాజయం ఎదురైంది. ఎన్డీఏ ప్రభంజనం ముందు.. 82 స్థానాల్లోనే నెగ్గింది యూపీఏ. ఓటమిపై కాంగ్రెస్​ అధిష్ఠానం చర్చిస్తోంది. పార్టీ అధ్యక్ష పదవికి రాహుల్​ గాంధీ రాజీనామా చేస్తారన్న ఊహాగానాల నేపథ్యంలో భేటీ ప్రాధాన్యం సంతరించుకుంది. సీడబ్ల్యూసీ సమావేశంలోనే రాహుల్​ రాజీనామా చేసే యోచనలో ఉన్నట్లు పార్టీ వర్గాల సమాచారం. ఈ విషయంపై సర్వత్రా ఆసక్తి నెలకొంది.

ఎన్నికల్లో ఓటమికి గల కారణాలు, వాటిని ఏ విధంగా అధిగమించి పార్టీని బలోపేతం చేయాలనే అంశంపై సీనియర్​ నేతలు చర్చించనున్నారు.