దేశంలోని ప్రముఖుల ప్రయాణాల కోసం కొనుగోలు చేసిన ప్రత్యేక బోయింగ్ 777 విమానం గురువారం మధ్యాహ్నం 3 గంటలకు భారత్ చేరనుంది. అమెరికాకు చెందిన బోయింగ్ సంస్థ నుంచి కొనుగోలు చేస్తోన్నఈ విహంగం.. రాష్ట్రపతి, ఉపరాష్ట్రపతి, ప్రధానమంత్రి ప్రయాణించడం కోసం ఉపయోగించునున్నారని అధికారులు వెల్లడించారు.
సాంకేతిక కారణాలతో ఆలస్యం
ఈ ఏడాది ఆగస్టు తొలినాళ్లలోనే విమానం బోయింగ్ సంస్థ నుంచి ఎయిర్ ఇండియాకు అప్పగించాల్సి ఉన్నా.. సాంకేతిక కారణాల వల్ల ఆలస్యమైనట్లు అధికారులు తెలిపారు. విహంగాన్ని స్వీకరించేందుకు ఆగస్టు రెండోవారంలో ఎయిర్ ఇండియాకు చెందిన ఓ సీనియర్ అధికారి అమెరికాకు వెళ్లినట్లు చెప్పారు.
దిల్లీ విమానాశ్రయానికి..
ఎయిర్ ఇండియా-1 గా పిలిచే ఈ విమానం టెక్సాస్ నుంచి దిల్లీ విమానాశ్రయానికి ఈ రోజు మధ్యాహ్నం 3 గంటల ప్రాంతంలో చేరుకుంటుందని అధికారులు తెలిపారు.
త్వరలోనే మరో విమానం..
వీవీఐపీల కోసం కొనుగోలు చేస్తోన్న మరో బోయింగ్ బీ777 విమానం కొద్ది రోజుల్లోనే భారత్కు చేరుతుందని అధికారులు తెలిపారు. ఈ రెండు విమానాలను ముందుగా ఈ ఏడాది జులైలోనే అందించాల్సి ఉన్నప్పటికీ.. కరోనా మహమ్మారి కారణంగా కొన్ని నెలలు వాయిదా పడినట్లు చెప్పారు.
వాయుసేన పైలట్లకే
ప్రముఖుల ప్రయాణాల్లో ఈ రెండు బీ777 విమానాలను ఎయిర్ ఇండియా పైలట్లు కాకుండా వాయుసేన పైలట్లు నడుపుతారని అధికారులు స్పష్టం చేశారు. ప్రస్తుతం రాష్ట్రపతి, ఉపరాష్ట్రపతి, ప్రధానమంత్రులు.. ఎయిర్ ఇండియాకు చెందిన బీ747 విమానంలో ప్రయాణం చేస్తున్నారు. వీటిని ఎయిర్ ఇండియా పైలట్లు ఆపరేట్ చేస్తున్నారు. బీ777 విమానాలు అందుబాటులోకి వచ్చాక బీ747లను ఎయిర్ ఇండియాలో కమర్షియల్ ఆపరేషన్స్ కోసం వినియోగించనున్నారు.
కొత్త విమానాలను 2018లో కొన్ని నెలల పాటు ఎయిర్ ఇండియాలో వినియోగించారు. తర్వాత వీవీఐపీల ప్రయాణాల కోసం ఆధునిక భద్రత పరికరాలు బిగించేందుకు బోయింగ్ సంస్థకు పంపించారు. ఇందులో క్షిపణి రక్షణ వ్యవస్థ (ఎల్ఏఐఆర్సీఎం, వ్యక్తిగత రక్షణ సూట్స్ ఉన్నాయి.
ఇదీ చూడండి: మహమ్మారుల్లో కరోనాతోనే అత్యధిక మరణాలు: ఐరాస
