కాంగ్రెస్ అధ్యక్షురాలు సోనియాగాంధీ, ఆమె కుటుంబ సభ్యుల భద్రత కోసం అనుసరించాల్సిన కొత్త విధానాలపై సీఆర్పీఎఫ్... కేంద్ర హోంమంత్రిత్వశాఖ ద్వారా రాష్ట్రాలు, కేంద్రపాలిత ప్రాంతాలకు లేఖలు రాసింది. గాంధీల భద్రత కోసం కనీసం ఒక బెటాలియన్ను అయినా పెంచడానికి చర్యలు తీసుకోవాలని హోంశాఖను కోరింది.
ఎస్పీజీ భద్రత తొలగింపు..
సోనియాగాంధీ, రాహుల్గాంధీ, ప్రియాంక గాంధీలకు కల్పిస్తున్న ఎస్పీజీ భద్రతను ఇటీవలే కేంద్రప్రభుత్వం తొలగించింది. మాజీ ప్రధాని మన్మోహన్సింగ్ సహా 'గాంధీ' కుటుంబ సభ్యులకు సెంట్రల్ రిజర్వ్ పోలీసు ఫోర్స్ (సీఆర్పీఎఫ్) ద్వారా 'జెడ్ ప్లస్' భద్రత కల్పించాలని నిర్ణయించింది.
24 గంటల ముందే..
గాంధీ కుటుంబ సభ్యులు, మన్మోహన్ సింగ్ దంపతుల భద్రత కోసం సీఆర్పీఎఫ్ ఇప్పటికే 700 మంది సిబ్బందిని కేటాయించింది. ఈ ఐదుగురి పర్యటనల సమయంలో ప్రత్యేక సీఆర్పీఎఫ్ బృందాలు.. సంబంధిత ప్రదేశాలకు కనీసం 24 గంటల ముందే చేరుకుంటాయి. స్థానిక అధికారులతో సంప్రదించి వేదికను, వీవీఐపీల సందర్శించే ప్రదేశాల్లో భద్రత తనిఖీలు చేస్తాయి.
అదనపు బలగాలు అవసరం...
సీఆర్పీఎఫ్లో ప్రస్తుతం 3 లక్షల మందికిపైగా సిబ్బంది ఉన్నారు. 57 మంది అత్యంత ప్రముఖుల భద్రతను ఆ దళం పర్యవేక్షిస్తోంది. ప్రముఖుల జాబితా పెరుగుతున్నందున కనీసం 1-2 బెటాలియన్లు (1000-2000 మంది సిబ్బంది) అదనంగా తీసుకోవాలని భావిస్తోంది.
ప్రముఖుల భద్రతను దృష్టిలో ఉంచుకుని ప్రత్యేక సాయుధ వాహనాలను కూడా సేకరించడానికి సీఆర్పీఎఫ్ ప్రయత్నం చేస్తున్నట్లు అధికారులు తెలిపారు.
ఇదీ చూడండి: కాలుష్యంపై లోక్సభలో చర్చ- ఆప్ సర్కారుపై విమర్శలు
