కన్నడనాట ఆగని 'సంకీర్ణ కూటమి' యుద్ధం

కర్ణాటకలో కాంగ్రెస్​-జేడీ(ఎస్​) మధ్య రాజకీయ వైరుద్ధ్యాలు రోజురోజుకూ తీవ్రమవుతున్నాయి. సంకీర్ణ భాగస్వామ్య పక్షాల మధ్య మాటల తూటాలు పేలుతున్నాయి.

కర్ణాటకలో కాంగ్రెస్​- జేడీ(ఎస్​) మధ్య వివాదాల పర్వం కొనసాగుతూనే ఉంది. ముఖ్య నేతలు ఒకరిపై ఒకరు విమర్శలు ఎక్కుపెట్టుకుంటున్నారు.

జేడీ(ఎస్​) రాష్ట్ర అధ్యక్షుడు విశ్వనాథ్​ తాజాగా సిద్ధరామయ్యపై విరుచుకుపడ్డారు. కాంగ్రెస్​ నేతలు సిద్ధరామయ్యే సీఎం అంటూ చేస్తున్న ప్రచారాన్ని తప్పుబట్టారు.

''సిద్ధరామయ్య ఏం చేశారు. మాజీ ముఖ్యమంత్రి దేవ్​రాజ్​ కంటే గొప్పగా పరిపాలించారా? 30 ఏళ్లయినా ఆయనను ప్రజలు ఇప్పటికీ గుర్తుంచుకుంటారు. దశాబ్దాల పాటు గుర్తుంచుకోదగిన ఒక్క మంచి పనైనా సిద్ధరామయ్య చేయగలిగారా? ఏమీ చేయలేదు.''

- విశ్వనాథ్​, కర్ణాటక జేడీ(ఎస్​) అధ్యక్షుడు

సిద్ధరామయ్య అంతే దీటుగా బదులిచ్చారు. విశ్వనాథ్​ వ్యాఖ్యలను సమన్వయ కమిటీ దృష్టికి తీసుకెళ్తానని ట్వీట్​ చేశారు.

'అంతకుముందు జీటీ దేవెగౌడ(ఉన్నత విద్యాశాఖ మంత్రి), ఇప్పుడు విశ్వనాథ్​. తర్వాత ఎవరో తెలియదు? జేడీ(ఎస్​) సీనియర్లు ఇది గమనిస్తే మంచిది. విశ్వనాథ్​ చేసిన బాధ్యతారాహిత్య వ్యాఖ్యలపై బహిరంగంగా విమర్శించకుండా సంకీర్ణ ధర్మం అడ్డుపడుతుంది.'

- సిద్ధరామయ్య ట్వీట్​

సిద్ధరామయ్య ట్వీట్​పైనా ఘాటుగా స్పందించారు విశ్వనాథ్​. కాంగ్రెస్​- జేడీ(ఎస్​) సమన్వయ కమిటీ ఛైర్​పర్సన్​గా ఏం చేశారని నిలదీశారు. సంవత్సరకాలంగా ఒక్క మంచి పనైనా చేశారా అని ప్రశ్నించారు.

ఇదే అదనుగా మధ్యలోకి భాజపా ప్రవేశించింది. విశ్వనాథ్​ వ్యాఖ్యలు జేడీ(ఎస్​) నాయకత్వానికి ప్రతిబింబమని ఆరోపించారు భాజపా రాష్ట్ర అధ్యక్షుడు బీఎస్​ యడ్యూరప్ప. ముఖ్యమంత్రి కుమారస్వామి అభిప్రాయాన్ని.. విశ్వనాథ్​తో చెప్పించారని విమర్శించారు.

భాజపా ఎమ్మెల్యేలు కాంగ్రెస్​లోకి!

లోక్​సభ ఎన్నికల ఫలితాల అనంతరం కొంతమంది భాజపా ఎమ్మెల్యేలు.. కాంగ్రెస్​ తీర్థం పుచ్చుకోనున్నారని సంచలన వ్యాఖ్యలు చేశారు కాంగ్రెస్​ ప్రధాన కార్యదర్శి కేసీ వేణుగోపాల్​. కేంద్రంలోనూ కాంగ్రెస్​ ప్రభుత్వమే ఏర్పాటవుతుందన్నారు. మే 23 తర్వాత స్వయంగా భాజపా శాసనసభ్యులే వచ్చి పార్టీలో చేరతారని ధీమా వ్యక్తం చేశారు.

ఇదీ చూడండి:

'మీరు అడ్డుకునేది నన్నే... భాజపా విజయాన్ని కాదు'