రాష్ట్రపతి భవన్​లో కరోనా కలకలం- 125 కుటుంబాలకు క్వారంటైన్​

భారత రాష్ట్రపతి నివాస పరిసరాల్లోకి కరోనా అడుగుపెట్టేసింది. రైసీనా హిల్స్​లో ఉన్న రాష్ట్రపతి భవన్​లో పనిచేస్తున్న ఓ వ్యక్తికి వైరస్​ పాటిజివ్​గా నిర్ధరణ అయింది. ఈ నేపథ్యంలో అప్రమత్తమైన అధికారులు.. దాదాపు 125 మంది సిబ్బంది కుటుంబాలను గృహ నిర్బంధంలో ఉంచారు.

దిల్లీని వణికిస్తున్న కరోనా వైరస్​.. అన్ని ప్రాంతాలను దాటి ఆఖరికి రాష్ట్రపతి భవన్​లోకి అడుగుపెట్టేసింది. రాష్ట్రపతి నివాసం సెక్రటరీ వద్ద పనిచేస్తున్న సిబ్బందిలో ఒకరికి కరోనా సోకింది. వైద్య పరీక్షల్లో అతడికి పాజిటివ్​ రాగా.. మొత్తం 125 మంది సిబ్బంది కుటుంబాలను క్వారంటైన్​కు తరలించారు. ఆ సెక్రటరీకీ స్వీయ నిర్బంధం సూచించారు.

ఇదీ జరిగింది..

సెక్రటరీ అయిన మహిళ ఇంటిలో... ఆ వ్యక్తి పారిశుద్ధ్య కార్మికుడుగా పనిచేస్తున్నాడు. తాజాగా అతడి భార్యకు వైరస్​ లక్షణాలు బయటపడగా... అప్రమత్తమైన అధికారులు అతడిని, తన భార్యను సహా మొత్తం 11 మంది కుటుంబ సభ్యులను ఐసోలేషన్​కు తరలించారు. ఆ ఇంటికి చుట్టుపక్కల ఉన్నవారికి స్వీయ నిర్బంధం విధించారు. మొత్తం కుటుంబాలకు అధికారులే ఆహారం సరఫరా చేస్తూ.. ఎవరినీ బయటకు రావొద్దని సూచించారు.

ఆమెకు ఎలా వచ్చిందంటే...

ఆ పారిశుద్ధ్య కార్మికుడి భార్యకు వైరస్​ రావడం వెనుక కారణాన్ని విశ్లేషించారు అధికారులు. కొవిడ్​-19తో చనిపోయిన ఓ బంధువు అంత్యక్రియలకు ఆమె హాజరైనట్లు తెలిసింది.

రాష్ట్రపతికీ పరీక్షలు...

గతంలో బాలీవుడ్​ నటి కనికా కపూర్​కు వైరస్​ పాటిజివ్​ రాగా.. ఆమె కలిసిన వ్యక్తుల్లో భాజపా ఎంపీ దుష్యంత్​ సింగ్​ ఉండటం సంచలనం సృష్టించింది. రాష్ట్రపతి రామ్​నాథ్​ కోవింద్​ ఇచ్చిన విందుకు.. ఆయన హాజరవడం పెద్ద చర్చనీయాంశమైంది. ఆ సమయంలో సమావేశంలో పాల్గొన్న రాష్ట్రపతి సహా అందరికీ కొవిడ్​-19 పరీక్షలు నిర్వహించారు. ఎవరికీ కరోనా సోకలేదని నిర్ధరించారు.

దిల్లీలో కరోనా వ్యాప్తి ఎక్కువగా కనిపిస్తోంది. మొత్తం బాధితుల సంఖ్య 2,081కి చేరగా.. ఇందులో 431 మంది కోలుకున్నారు. 47 మంది మృతిచెందారు.

ఇదీ చదవండి:53 మంది జర్నలిస్టులకు సోకిన మహమ్మారి​​