కరోనా కొత్త రికార్డ్- ఒక్కరోజులో 6వేలకు పైగా కేసులు

మనదేశంలో కరోనా కేసులు రికార్డు స్థాయిలో నమోదవుతున్నాయి. పలు రాష్ట్రాల్లో వైరస్ బాధితుల సంఖ్య గణనీయంగా పెరుగుతోంది. మహారాష్ట్రలో ఒక్కరోజే 2 వేలకు పైగా పాజిటివ్ కేసులు వచ్చాయి. దిల్లీలో 660, గుజరాత్​లో 363 కేసులు నమోదయ్యాయి. దేశవ్యాప్తంగా శుక్రవారం ఒక్కరోజే 6,008 మంది వైరస్​ బారిన పడినట్లు అధికారులు తెలిపారు.

లాక్​డౌన్​ సడలింపుల తర్వాత భారత్​లో కరోనా విజృంభిస్తోంది! శుక్రవారం రికార్డుస్థాయిలో 6వేలకుపైగా కొత్త కేసులు నమోదయ్యాయి. దేశవ్యాప్తంగా 1లక్ష 18,447 మంది వైరస్​ బారిన పడ్డారు. మరో 148 మంది వైరస్​కు బలయ్యారు. ఇప్పటివరకు చనిపోయిన వారి సంఖ్య 3,583కు చేరింది. 48,534 మంది కొవిడ్​నుంచి కోలుకున్నట్లు కేంద్ర ఆరోగ్యశాఖ తెలిపింది.

పలు రాష్ట్రాల్లో కొత్త కేసులు అమాంతం పెరుగుతున్నాయి. మహారాష్ట్రలో వరుసగా ఆరో రోజు రెండువేల మందికి పైగా వైరస్​ బారిన పడ్డారు. రాష్ట్రవ్యాప్తంగా శుక్రవారం కొత్తగా 2,940 మందికి మహమ్మారి సోకినట్లు అధికారులు తెలిపారు. ఇప్పటివరకు ఒక్కరోజులో నమోదైన కేసుల్లో ఇవే అత్యధికం. రాష్ట్రంలో మొత్తం 44,852 మంది వైరస్​ బారిన పడినట్లు పేర్కొన్నారు. మరో 63 మంది చనిపోగా.. మరణించిన వారి సంఖ్య 1,517కు పెరిగిందని స్పష్టం చేశారు అధికారులు.

600కుపైగా కేసులు

దిల్లీలోనూ రికార్డుస్థాయిలో 660 మంది వైరస్​ బారిన పడ్డారు. దీంతో కరోనా బాధితుల సంఖ్య 12,319కి చేరింది. ఇప్పటివరకు 208 మంది మృత్యువాత వడ్డారు.

13వేలుకు పైగా బాధితులు..

గుజరాత్​లో కొత్తగా 363 మందికి కరోనా నిర్ధరణ అయ్యింది. రాష్ట్రంలో ఇప్పటివరకు 13,273 మందికి వైరస్ సోకింది. మరో 29మంది కొవిడ్​తో మరణించారు. మెత్తం 802 మంది మహమ్మారికి బలయ్యారు. ​ రాజస్థాన్​, మధ్యప్రదేశ్​, అసోం, కేరళ, ఆంధ్రప్రదేశ్​ సహా అనేక రాష్ట్రాలు, కేంద్ర పాలిత ప్రాంతాల్లో శుక్రవారం కొత్త కేసులు నమోదయ్యాయి.

వారినుంచే కొత్తకేసులు

ఇటీవలే శ్రామిక్​ రైళ్ల ద్వారా ఇతర రాష్ట్రాల నుంచి స్వస్థలాలకు చేరుకున్న వలసదారుల్లో కొత్త కేసులు నమోదవుతున్నట్లు అధికారులు తెలిపారు. అంతేకాకుండా, విదేశాల్లో చిక్కుకున్న భారతీయుల కోసం ఏర్పాటు చేసిన ప్రత్యేక విమానాల్లో తిరిగి వచ్చిన వారికీ కరోనా పాజిటివ్​ నిర్ధరణ అవుతున్నట్లు స్పష్టం చేశారు.

లాక్​డౌన్​ విధించకుండా ఉన్నట్లైతే.. ఇప్పటికి దేశంలో 30 లక్షలకు పైగా వైరస్​ కేసులు పెరిగేవని కొన్ని నివేదికలు తెలిపాయి. సుమారు 2.1 లక్షల మంది మరణించే వారని పేర్కొన్నాయి.