భారత ఔషధ నియంత్రణ సంస్థ (డీసీజీఐ)... మూడు సంస్థలకు చెందిన 'కరోనా టెస్టింగ్ కిట్ల దిగుమతి లెసెన్సు'లను రద్దు చేసింది. అలాగే మరో 16 సంస్థలకు చెందిన లైసెన్సులను నిలిపివేసింది.
అమెరికా ఔషధ నియంత్రణ సంస్థ (యూఎస్ఎఫ్డీఏ)... కరోనా సెరాలజీ టెస్ట్ కిట్స్ తయారీదారులను... నిర్దేశిత జాబితా నుంచి తొలగించడమే ఇందుకు కారణమని డీసీజీఐ స్పష్టం చేసింది. అలాగే ఇప్పటికే దిగుమతి చేసిన ఈ కిట్లను తదుపరి ఉత్తర్వులు వచ్చే వరకు పంపిణీ చేయకూడదని ఆదేశించింది.
లైసెన్సులు రద్దు..
కాడిలా హెల్త్కేర్, ఎండీఏఏసీ ఇంటర్నేషనల్, ఎన్డబ్ల్యూ ఓవర్సీస్ కంపెనీలు దిగుమతి లైసెన్స్లను రద్దు చేసిన జాబితాలో ఉన్నాయి. అలాగే ట్రాన్సేసియా బయో మెడికల్స్, కాస్మిక్ సైంటిఫిక్, ఇన్బియోస్ ఇండియా, ఎస్డీ బయోసెన్సార్, అక్యురెన్స్ బయోమెడికల్స్, బయోహౌస్ సొల్యూషన్స్, ట్రివిట్రాన్ హెల్త్కేర్ లాంటి 16 సంస్థల లైసెన్స్లను సస్పెండ్ చేసింది.
"జులై 17న ఈ కంపెనీలకు షోకాజ్ నోటీసులు జారీ చేశాం. కొవిడ్ సెరాలజీ టెస్ట్ కిట్ల తయారీదారులను 'యూఎస్ఎఫ్డీఏ' తన జాబితా నుంచి తొలగించింది. అందుకే ఈ కంపెనీలకు ఇచ్చిన దిగుమతి లైసెన్స్లు రద్దు చేస్తున్నట్లు తెలియజేశాం. అలాగే ఇప్పటికే దిగుమతి చేసుకున్న కిట్లను తదుపరి ఉత్తర్వులు వచ్చే వరకు పంపిణీ చేయవద్దని ఆదేశించాం. దీనిపై జులై 20లోగా దీనిపై సమాధానం చెప్పాలని ఆ కంపెనీలకు ఆదేశించాం. వారు ఏమీ చెప్పని పక్షంలో.. డ్రగ్స్ అండ్ కాస్మటిక్స్ యాక్టు ప్రకారం తదుపరి చర్యలు తీసుకుంటాం."
- డ్రగ్ కంట్రోలర్ జనరల్ ఆఫ్ ఇండియా (డీసీజీఐ)
ఇదీ చూడండి:భారత్లో ఒక్కరోజే 4.20 లక్షల కరోనా టెస్టులు