దేశంలో ఈ ఏడాది నాలుగు నెలల వర్షాకాలంలో.. సాధారణం కంటే ఎక్కువ వర్షపాతం నమోదైనట్లు భారత వాతావరణ శాఖ స్పష్టం చేసింది. సగటు వర్షపాతం 109 శాతంగా ఉన్నట్లు తెలిపింది ఐఎండీ. జూన్ (107 శాతం), ఆగస్టు (127 శాతం), సెప్టెంబర్ (105 శాతం)లలో సాధారణ కంటే ఎక్కువగా వర్షపాతం నమోదు కాగా.. జులైలో లోటు వర్షపాతం కంటే తక్కువగా 90 శాతం మాత్రమే వర్షాలు కురిశాయి.
వర్షకాలంలో దీర్ఘకాలిక సగటు(ఎల్పీఏ) 96 నుంచి 104 శాతంగా ఉంటే దానిని సాధారణ వర్షపాతంగా గుర్తిస్తారు.
" 1961-2010 డేటా ఆధారంగా లెక్కించిన దీర్ఘకాల సగటు 87.7 సెంటీమీటర్లు. అయితే ఈ ఏడాది జూన్ 1 నుంచి సెప్టెంబర్ 30 వరకు 95.4 సెంటీమీటర్ల మేర (109 శాతం) ఎక్కువ వర్షపాతం నమోదైంది. 1990 నుంచి ఇప్పటి వరకు పరిశీలిస్తే.. 1994, 2019 వరుస సంవత్సరాల్లో మాత్రమే దీర్ఘకాల సగటు 110 శాతంగా నమోదైంది. ఈ సంవత్సరాల్లో ఎల్పీఏకు 9 శాతం అధికంగా వర్షపాతం నమోదైంది."
- ఆర్కే జెనమాని, ఎన్డబ్ల్యూఎఫ్సీ శాస్త్రవేత్త.
భారత్లో వర్షాకాలం అధికారికంగా జూన్ 1న ప్రారంభమై సెప్టెంబర్ 30తో ముగుస్తుంది. ఈశాన్య రుతుపవనాలు దేశీయ వార్షిక వర్షపాతంలో 70 శాతం నమోదు చేస్తాయి. ఈ రుతుపవనాలు వ్యవసాయానికి చాలా కీలకం. ఈసారి కురిసిన వర్షాలతో ఖరీఫ్లో సాగు విస్తీర్ణం పెరిగింది. గత ఏడాది 1,066.06 లక్షల హెక్టార్లలో పంట సాగు కాగా.. ఈ ఏడాది అది 1,116.88 లక్షల హెక్టార్లుగా ఉంది.
- ఐఎండీకి నాలుగు డివిజన్లు ఉన్నాయి. తూర్పు, ఈశాన్య భారత్, సెంట్రల్ ఇండియా, దక్షిణ భారత్లలో సాధారణం కంటే అధిక వర్షపాతం నమోదయింది. వాయువ్య భారత్ డివిజన్లో లోటు కన్నా తక్కువ వర్షపాతం నమోదు అయింది.
- 19 రాష్ట్రాలు, కేంద్ర పాలిత ప్రాంతాల్లో సాధారణ వర్షపాతం నమోదైంది. 9 రాష్ట్రాలు, కేంద్ర పాలిత ప్రాంతాల్లో అధిక వర్షపాతం కురిసింది. అందులో బిహార్, గుజరాత్, మేఘాలయ, గోవా, ఆంధ్రప్రదేశ్, తెలంగాణ, తమిళనాడులు ఉన్నాయి. కర్ణాటక, లక్షద్వీప్లలో సాధారణం కంటే అధిక వర్షపాతం నమోదవగా.. సిక్కింలో అత్యధికంగా వర్షాలు పడ్డాయి.
- నాగాలాండ్, మణిపుర్, మీజోరాం, త్రిపుర, ఉత్తరాఖండ్, హిమాచల్ప్రదేశ్, జమ్ముకశ్మీర్లలో లోటు వర్షపాతం నమోదైంది. అందులో లద్దాఖ్లో తీవ్రలోటు ఏర్పడింది.
- జూన్ 1న రుతుపవనాలు కేరళను తాకాయి. వాటికి నిసర్గ తుపాను బలం చేకూర్చింది. అవి 12 రోజుల ముందుగానే జూన్ 26 నాటికి దేశవ్యాప్తంగా విస్తరించాయి. సాధారణ తేదీ కన్నా 11 రోజుల ఆలస్యంగా రుతుపవనాలు వైదొలిగాయి. ఆగస్టులో ఐదు అల్పపీడనాలు ఏర్పడ్డాయి. అది కేంద్ర భారత్లో అత్యధిక వర్షపాతానికి దారితీసింది.
ఇదీ చూడండి: 2 రోజుల్లో నైరుతి రుతుపవనాల తిరోగమనం
