8 నెలలుగా చెట్టుకు వేలాడుతున్న శవం!

సహజంగా మరణించిన వ్యక్తికి వెంటనే అంతిమ సంస్కారాలు నిర్వహిస్తారు. లేకపోతే ఆత్మ భూమిని వదలదని కొందరు నమ్ముతారు. కానీ గుజరాత్​లో ఓ వ్యక్తి మృతదేహాన్ని కుటుంబ సభ్యులు 8 నెలల ముందు చెట్టుకు వేలాడదీశారు. అప్పటి నుంచి ఆ నిర్జీవ శరీరం అక్కడే పడి ఉంది. వారు ఎందుకలా చేశారు? అసలేంటీ ఆ కథ?

గుజరాత్​లో 8 నెలలుగా ఓ మృతదేహం చెట్టుకు వేలాడుతోంది. మృతుడి కుటుంబ సభ్యులే శవాన్ని వేలాడదీశారు. తమ బంధువును ఎవరో హత్య చేశారని... న్యాయం జరిగేంత వరకు మృతదేహం చెట్టుకే ఉంటుందని తేల్చిచెబుతున్నారు.

ప్రేమించడమే కారణమా?

సాబర్​కాంఠా జిల్లాలోని టధివేది గ్రామంలో ఓ వ్యక్తి మృతదేహాన్ని కుటుంబ సభ్యులు చెట్టుకు వేలాడదీశారు. ఓ అమ్మాయిని తమ బంధువు ప్రేమించాడని, వారి ప్రేమను వ్యతిరేకించిన అమ్మాయి తరఫు కుంటుంబ సభ్యులు అతణ్ని హతమార్చారని ఆరోపించారు. తమకు న్యాయం జరిగే వరకు శవాన్ని చెట్టు నుంచి దించమని స్పష్టం చేశారు. 8 నెలలుగా ఆ మృతదేహం చెట్టుకే వేలాడుతోంది.

వర్షాకాలంలో మృతదేహం కుళ్లిపోయి దుర్వాసన వచ్చే అవకాశముందని పరిసర ప్రాంత ప్రజలు ఆవేదన వ్యక్తం చేశారు.

అయితే ఈ విషయంపై పోలీసుల కథనం వేరేలా ఉంది. మరణించిన వ్యక్తిది హత్య కాదని... ఆత్మహత్యేనని చెబుతున్నారు. పంచనామ​ నివేదిక ప్రకారమే కేసు నమోదు చేసినట్టు వివరించారు.

'చదోటరు' సంప్రదాయం...

టధివేది సహా పరిసర​ ప్రాంతాల్లోని గిరిజనులు తరతరాలుగా 'చదోటరు' సంప్రదాయాన్ని పాటిస్తున్నారు. దీని ప్రకారం అసహజ మరణాల్లో అనుమానాలు వ్యక్తమైతే... అనుమానితులు బాధితుడి కుటుంబానికి డబ్బులు చెల్లించాలి. అనంతరం ఆ సొమ్మును అంతర్గతంగా పంచుకుంటారు.
ప్రస్తుత కేసు విషయంలోనూ మృతుడి కుటుంబ సభ్యులు ఇదే సంప్రదాయాన్ని పాటిస్తున్నారు.

ఇదీ చూడండి:- డ్యాం కూల్చిన పీతలు మంత్రి ఇంటికొచ్చాయ్!