భారత్​-చైనా మధ్య దోస్తీ కుదిరేనా?

తూర్దు లద్దాఖ్​ సరిహద్దులో నెలకొన్న ఉద్రిక్త పరిస్థితులను తగ్గించేందుకు భారత్​-చైనా మధ్య నాలుగో విడత కార్ప్స్​ కమాండర్​ స్థాయి చర్చలు జరుగుతున్నాయి. గతంలో కుదిరిన ఏకాభిప్రాయం మేరకు ఇప్పటికే పలు కీలక ప్రాంతాల నుంచి బలగాలను ఉపసంహరించుకున్నాయి ఇరు దేశాలు. వాస్తవాధీన రేఖ వెంబడి బలగాలను పూర్తి స్థాయిలో విరమించుకునే విషయంపై చర్చించేందుకు నేడు మరోమారు భేటీ అయ్యాయి.

భారత్​-చైనా మధ్య నాలుగో విడత కార్ప్స్​ కమాండర్​ స్థాయి చర్చలు లద్దాఖ్​లోని త్రిశూల్​లో జరుగుతున్నాయి. సరిహద్దులో నెలకొన్న ఉద్రిక్త పరిస్థితులను తగ్గించేందుకు కీలక ప్రదేశాల నుంచి ఇప్పటికే బలగాలను ఉపసంహరించుకున్నాయి ఇరు దేశాలు. గత చర్చల్లో కుదిరిన ఏకాభిప్రాయం మేరకు ఈ ప్రక్రియ పూర్తి చేశాయి. ఇప్పుడు వాస్తవాధీన రేఖ వెంబడి బలగాలను పూర్తి స్థాయిలో విరమించుకుని మునపటిలా సాధారణ పరిస్థితులు నెలకొల్పే విషయంపై చర్చించేందుకు ఇరు దేశాల సైనికాధికారులు సమావేశమయ్యారు.

పరస్పర అంగీకారం మేరకు మొదటి విడత బలగాల ఉపసంహరణలో భాగంగా గల్వాన్​ లోయ, హాట్​ స్ప్రింగ్స్​, పెట్రోలింగ్ పాయింట్​-15, ఫింగర్​-4, ఫింగర్-5 ప్రాంతాల నుంచి 2 కీ.మీ మేర సైనికులను వెనక్కి మళ్లించింది చైనా. భారత్​ కూడా తమ బలగాలను వెనక్కి రప్పించింది.

సైనికులు లేని ప్రాంతాలను తాత్కాలిక నాన్​-పెట్రోలింగ్​ జోన్లుగా ఇరు దేశాలు గుర్తిస్తాయి. అక్కడ బలగాలను మోహరించవు.

జాతీయ భద్రతా సలహాదారు అజిత్​ డోభాల్​, చైనా విదేశాంగ మంత్రి వాంగ్ యీలు జులై 5న రెండు గంటల పాటు ఫోన్లో సంభాషించిన అనంతరం జులై 6 నుంచి బలగాల ఉపసంహరణ ప్రక్రియను ప్రారంభించాయి భారత్​-చైనా.