దేశంలో కరోనా కేసులు పెరుగుతున్నందున కేంద్ర ప్రభుత్వంతో పాటు ఆయా రాష్ట్రాలు నివారణ చర్యలు చేపట్టాయి. జనసమూహం ఎక్కువగా ఉండే ప్రాంతాలు, వ్యాపార సముదాయాలను మూసివేస్తున్నాయి.
పార్లమెంటులోకి ప్రవేశం రద్దు
కరోనా వైరస్ వ్యాప్తి నేపథ్యంలో లోక్సభ సచివాలయం కీలక నిర్ణయం తీసుకుంది. ముందస్తు జాగ్రత్తల్లో భాగంగా సాధారణ ప్రజలు పార్లమెంటు ఆవరణలోకి వచ్చేందుకు ఇచ్చే పాసులను రద్దు చేస్తూ నిర్ణయం తీసుకుంది. ఈ ఆదేశాలతో పార్లమెంటు భవనాన్ని ప్రజలు సందర్శించేందుకు అవకాశం లేదు. తదుపరి ఆదేశాలు వచ్చే వరకు ఈ నిర్ణయం అమలులో ఉంటుందని స్పష్టం చేశారు అధికారులు. పాసులు ఇవ్వాలని సిఫార్సులు చేయొద్దని పార్లమెంటు సభ్యులకు స్పష్టం చేసింది లోక్సభ సచివాలయం.
గోవాలో అన్నీ బంద్
పర్యటక ప్రాంతం గోవాలో ప్రస్తుతం కరోనా కేసు నమోదు కాకపోయినప్పటికీ.. ముందస్తు జాగ్రత్త చర్యలు చేపట్టింది అక్కడి ప్రభుత్వం. ఈనెలాఖరు వరకు విద్యాసంస్థలు, క్యాసినోలు, స్విమ్మింగ్ పూల్స్, పబ్బులు, థియేటర్లు, మూసివేస్తూ ఆదేశాలు జారీ చేసింది. ఆదివారం అర్ధరాత్రి నుంచి ఈ నిర్ణయం అమలులోకి వస్తుందని స్పష్టం చేసింది. 10, 12వ తరగతి పరీక్షలు యథావిథిగా కొనసాగుతాయని తెలిపింది ప్రభుత్వం.
రైళ్లలో దుప్పట్లు ఇవ్వరు
కరోనా వైరస్ వ్యాప్తిని అడ్డుకునే చర్యల్లో భాగంగా రైళ్లలోని ఏసీ కంపార్ట్మెంట్లో దుప్పట్లు, కర్టేన్లు అందించకూడదని నిర్ణయించినట్లు ఆగ్నేయ రైల్వే విభాగం, ఈస్ట్కోస్ట్ రైల్వే ప్రకటించింది. ఈ రెండు జోన్ల పరిధిలో నడిచే అన్ని రైళ్లకు ఈ నిబంధన వర్తిస్తుందని స్పష్టం చేసింది. ప్రయాణికులకు అవసరమైనంత మేర ఉష్ణోగ్రతలను నియంత్రిస్తున్నందున దుప్పట్లు అవసరం లేదని ఎస్ఈఆర్ ప్రతినిధి సంజయ్ ఘోష్ తెలిపారు. ఎవరికైనా కావాలంటే.. అందిస్తామని చెప్పారు.
ఇదీ చూడండి: కరోనా ఎఫెక్ట్: 72 అత్యవసర వ్యాజ్యాలు మాత్రమే విచారణ
