'పీఎం కేర్స్'​కు విరాళాల వెల్లువ.. పవర్​ గ్రిడ్​ రూ.200 కోట్లు

కరోనా మహమ్మారి కట్టడి కోసం విరాళాల సేకరణకై ప్రధానమంత్రి నరేంద్ర మోదీ ప్రారంభించిన 'పీఎం కేర్స్'​కు వివిధ రంగాల నుంచి విశేష స్పందన లభిస్తోంది. పవర్​ గ్రిడ్​ రూ.200 కోట్లు, ప్రభుత్వ బీమా సంస్థ ఎల్​ఐసీ రూ.105 కోట్లు ప్రకటించింది. ప్రధాని మోదీ తల్లి హీరాబెన్​ తాను దాచుకున్న దాంట్లోంచి రూ.25వేలు సాయంగా అందించారు.

కరోనా మహమ్మారిపై పోరుకు కేంద్ర ప్రభుత్వం ఏర్పాటు చేసిన పీఎం కేర్స్​ (ప్రధానమంత్రి సిటిజెన్​ అసిస్టెన్స్​ అండ్​ రిలీఫ్​ ఇన్​ ఎమర్జెన్సీ సిచ్యుయేషన్స్​ ఫండ్​)కు విరాళాలు వెల్లువెత్తుతున్నాయి. దేశంలోని ప్రభుత్వ, ప్రైవేటు రంగ సంస్థలు, రాజకీయ, సినీ, పారిశ్రామిక వర్గాల నుంచి విశేష స్పందన లభిస్తోంది.

పవర్​ గ్రిడ్​ రూ.200 కోట్లు

కేంద్ర ప్రభుత్వ సంస్థ పవర్​ గ్రిడ్​ కార్పోరేషన్​ ఆఫ్​ ఇండియా పీఎం కేర్స్​ నిధికి రూ.200 కోట్లు విరాళంగా ఇస్తున్నట్లు ప్రకటించింది. ఈ నిధులను రెండు విడతలుగా అందించనున్నట్లు స్పష్టం చేసింది. మొదట రూ.130 కోట్లు పీఎం కేర్స్​కు అందించి.. వచ్చే ఆర్థిక సంవత్సరం 2020-21లో రూ.70 కోట్లు ఇవ్వనున్నట్లు తెలిపింది. సంస్థ ఉద్యోగులు కూడా తమ జీతాల్లోనుంచి విరాళం అందించేందుకు సుముఖంగా ఉన్నట్లు పేర్కొంది.

ఎల్​ఐసీ..రూ.105 కోట్లు

కరోనా నియంత్రణకు పీఎం కేర్స్​ నిధికి రూ.105 కోట్లు విరాళంగా ప్రకటించింది భారతీయ జీవిత బీమా సంస్థ (ఎల్​ఐసీ). ఇందులో రూ.5 కోట్లు గోల్డెన్​ జూబ్లీ ఫండ్​ నుంచి అందిస్తామని తెలిపింది.

ఇండియాబుల్స్​..

కరోనాపై పోరుకు పీఎం కేర్స్​ నిధికి 'ద ఇండియా బుల్స్​ గ్రూప్'​ రూ.21 కోట్లు విరాళంగా ప్రకటించింది. వైరస్​ను అరికట్టే చర్యల్లో కేంద్ర, రాష్ట్ర ప్రభుత్వాలకు తమవంతు సహకారం అందిస్తామని పేర్కొంది.

లక్ష్మీ మిత్తల్​ రూ.100 కోట్లు.

పీఎం కేర్స్​ నిధికి ఎన్​ఆర్​ఐ బిలియనీర్​ లక్ష్మీ ఎన్​ మిత్తల్​ రూ.100 కోట్లు విరాళంగా ఇస్తున్నట్లు ప్రకటించారు. భారత్​లోని ఆయన భాగస్వామ్య సంస్థల ద్వారా ఈ విరాళం అందిస్తున్నట్లు తెలిపారు. ఇప్పటికే రోజుకు 5వేల మందికి ఆహారం, 30వేల మందికి నిత్యావసరాలు అందిస్తున్నట్లు వెల్లడించారు.

మోదీ తల్లి.. రూ.25 వేలు

కరోనాపై కేంద్ర ప్రభుత్వం చేస్తున్న పోరాటానికి మద్దతుగా ప్రధానమంత్రి నరేంద్ర మోదీ తల్లి హీరాబెన్​ తన సాయాన్ని అందించారు. ఆమె దాచుకున్న సొమ్ములోంచి రూ.25,000ల మొత్తాన్ని పీఎం కేర్స్​ నిధికి అందించారు.

ఈడీ ఉద్యోగులు..

కేంద్ర దర్యాప్తు సంస్థ ఎన్​ఫోర్స్​మెంట్​ డైరెక్టరేట్​లోని ఉద్యోగులు తమ ఒక్కరోజు వేతనాన్ని పీఎం కేర్స్​ నిధికి ఇచ్చేందుకు ముందుకువచ్చారు.

ఇదీ చూడండి: దేశం​లో 1400కు చేరువలో కరోనా కేసులు.. 35 మంది మృతి