కరోనా దేశంలో వేగంగా వ్యాప్తి చెందుతోంది. తాజాగా ఈశాన్య రాష్ట్రం ఒడిశాలో కొత్తగా ఒకరికి వైరస్ సోకింది. దీంతో కేసుల సంఖ్య 114కు చేరింది. లద్దాఖ్, జమ్ము కశ్మీర్, కేరళలోనూ ఇవాళ ఒకటి చొప్పున కేసులు నమోదయ్యాయి. మహారాష్ట్రలో మరో నలుగురికి వైరస్ సోకింది.
114 మంది కేసుల్లో 17 మంది విదేశీయులు. మరో 13 మందికి వైరస్ తీవ్రత తగ్గగా.. డిశ్చార్జి అయ్యారు. ఇప్పటివరకు రెండు మరణాలు నమోదయ్యాయి.
ప్రపంచవ్యాప్తంగా కొవిడ్-19 కోరలు చాస్తుంది. డబ్ల్యూహెచ్ఓ లెక్కల ప్రకారం.. వైరస్ 135 దేశాల్లో విస్తరించింది. 5700 మందికిపైగా వైరస్కు బలయ్యారు. మరో లక్షా 53 వేల 517 మంది వైరస్ బారిన పడ్డారు.
మహారాష్ట్రలో...
దేశంలో మహారాష్ట్రలోనే ఎక్కువ కేసులు నమోదయ్యాయి. కొత్తగా వైరస్ సోకిన నలుగురు బాధితులతో కలిపి మొత్తం 37 మంది కరోనా చికిత్స తీసుకుంటున్నారు. కేరళలో మొత్తం కేసులు 21కి చేరాయి.
ఒడిశాలో..
ఒడిశాలో ఓ వ్యక్తికి వైరస్ సోకినట్లు అక్కడి అధికారులు తెలిపారు. బాధితుడు ఇటలీ నుంచి మార్చి 6న స్వదేశానికి వచ్చినట్లు తెలుస్తోంది. మార్చి 13న తలనొప్పి, జ్వరం లక్షణాలతో ఆస్పత్రిలో చేరాడు. ప్రస్తుతానికి అతని ఆరోగ్యం నిలకడగా ఉన్నట్లు తెలిపారు వైద్యులు. ఆ వ్యక్తి కుటుంబ సభ్యులను నిర్బంధంలో ఉంచి.. నిశితంగా పరిశీలిస్తున్నారు.
కరోనా వైరస్ అంతకంతకూ విస్తరిస్తున్న కారణంగా దేశవ్యాప్తంగా కఠిన ఆంక్షలు అమలు చేస్తున్నారు. ఆయా రాష్ట్రాలు అత్యంత జాగ్రత్తగా వ్యవహరిస్తున్నాయి. జిమ్లు, సినిమా హాళ్లు, ఈత కొలనులు, ఇతర జనావాస ప్రాంతాలను తాత్కాలికంగా మూసివేస్తూ నిర్ణయం తీసుకున్నాయి.
హస్తినలో...
దిల్లీలో సాంస్కృతిక, రాజకీయ, సామాజిక కార్యక్రమాలపైనా ఆంక్షలు విధించారు ముఖ్యమంత్రి అరవింద్ కేజ్రీవాల్. 50 మందికన్నా ఎక్కువగా ప్రజలు గుమిగూడటంపై నిషేధం అమల్లో ఉందని, మార్చి 31 వరకు ఇది వర్తిస్తుందని స్పష్టం చేశారు సీఎం.
