'ఎంపీ ల్యాడ్స్​ నిధుల రద్దు నిర్ణయాన్ని పునఃసమీక్షించాలి'

కరోనాపై పోరుకు ఎంపీ ల్యాడ్స్​ నిధుల్ని 2 సంవత్సరాల రద్దు నిర్ణయంపై పునఃసమీక్షించాలని డిమాండ్​ చేసింది కాంగ్రెస్​. ఈ నిధులను రద్దు చేయడం వల్ల ఎంపీలు తమ నియోజకవర్గాల్లో సమర్థవంతంగా పనిచేయలేరని వెల్లడించింది. అయితే ఎంపీల జీతాల్లో 30 శాతం విధించిన కోత నిర్ణయాన్ని మాత్రం స్వాగతించింది.

కరోనాపై పోరుకు కేంద్రం... ఎంపీల జీతాల్లో 30శాతం కోత విధిస్తూ తీసుకున్న నిర్ణయాన్ని కాంగ్రెస్​ స్వాగతించింది. అయితే ఎంపీ ల్యాడ్స్​ నిధుల్ని.. 2 సంవత్సరాల పాటు కేంద్రం రద్దు చేయడాన్ని వ్యతిరేకించింది. ఈ నిర్ణయాన్ని పునఃసమీక్షించాలని డిమాండ్​ చేసింది.

ఈ ఎంపీ ల్యాడ్స్​ నిధులను ఎంపీలు తమ వ్యక్తిగత అవసరాల కోసం వినియోగించుకోవట్లేదని, తమ నియోజకవర్గాల అభివృద్ధి కోసం వినియోగిస్తున్నారని కాంగ్రెస్​ స్పష్టం చేసింది.

"ఏంపీల జీతాల్లో కోతను కాంగ్రెస్​ స్వాగతిస్తుంది. కానీ ఎంపీ ల్యాడ్స్​ ఓ ఎంపీ.. తన నియోజకవర్గాన్ని అభివృద్ధి చేసుకునేందుకు వినియోగించే నిధులని మీరు గుర్తించాలి. వీటిని రద్దు చేస్తే.. నియోజకవర్గం అభివృద్ధిలో ఓ ఎంపీ పాత్ర ఏమాత్రం ఉంటుంది? ఈ నిధులను మేము ప్రకృతి వైపరిత్యాలు, కరోనా లాంటి ప్రాణాంతక వ్యాధులు సంభవించినప్పుడు.. వాటిని ఎదుర్కొనేందుకు కూడా వినియోగిస్తున్నాము. ఒకవేళ ఈ నిధులను కేంద్రం సమకూర్చకపోతే... ఈ ప్రభావం నేరుగా ప్రజలపై పడుతుంది. ఎంపీలు తమ నియోజకవర్గ అభివృద్ధి కోసం సమర్థవంతంగా పనిచేయలేరు. ఈ నిర్ణయంపై ప్రభుత్వం పునఃసమీక్ష చేయాల్సిన అవసరం ఉంది."

- రణ్​దీప్​ సుర్జేవాలా, కాంగ్రెస్​ ప్రతినిధి.

కేంద్రప్రభుత్వం ఇలాంటి నిర్ణయం తీసుకునే బదులుగా అనవసరమైన ఖర్చులు తగ్గించుకోవాలని సూచించారు సుర్జేవాల. దీనివల్ల ప్రభుత్వానికి 4-5లక్షల కోట్లు మిగులుతాయన్నారు.

మరోవైపు కాంగ్రెస్​ సీనీయర్​ నేత శశి థరూర్ కూడా​... కేంద్రం నిర్ణయాన్ని తప్పుబట్టారు. ఓ ఎంపీ.. తన నియోజకవర్గాన్ని అభివృద్ధి చేసుకునేందుకు ఉన్న ఎకైక మార్గం ఈ ఎంపీ ల్యాడ్స్​ నిధులేనని.. వాటిని రద్దుచేయడం ఏంటని ప్రశ్నించారు. అయితే.. తనకు ఇచ్చిన నిధులను.. తన నియోజకవర్గం(కేరళలోని తిరువనంతపురం)లో ఆరోగ్య కిట్లు, పీపీఈలు పొందేందుకు ఉపయోగించినట్టు స్పష్టం చేశారు.

అయితే.. మరో కాంగ్రెస్​ సీనియర్​ నేత జైరామ్​ రమేష్...​ పార్టీ వైఖరికి వ్యతిరేకంగా కేంద్రం నిర్ణయాన్ని స్వాగతించారు.

కాంగ్రెస్​తో పాటు తృణముల్​ కాంగ్రెస్​, సీపీఐఎమ్​లు కూడా ఎంపీ ల్యాడ్స్​ను రద్దు చేయాలన్న కేంద్రం నిర్ణయాన్ని వ్యతిరేకించాయి. ఇలాంటి నిర్ణయాలు తీసుకునే ముందు.. చర్చలు జరిపి ఉండాల్సిందని ఆప్​ పేర్కొంది.

ఇది చూడండి : ఎంపీల వేతనాల్లో 30% కోత.. కేంద్రం కీలక నిర్ణయం