మానసికంగా కుంగదీస్తున్న కరోనా మహమ్మారి

కరోనాతో తీవ్ర మానసిక సమస్యలు ఎదురవుతున్నాయి. వ్యాధి సోకుతుందేమోనన్న భయాలతో చాలా మంది మానసికంగా కుంగిపోతున్నారు. చివరకు ఇది ఆత్మహత్యలకు దారితీస్తోంది.

కరోనాతో శారీరక ఇబ్బందులతో పాటు మానసిక సమస్యలు ఎదురవుతున్నాయి. రోజుల తరబడి ఇళ్లకే పరిమితం కావడం, ఆర్థిక సమస్యలు ఎదురవడం, వ్యాధి సోకుతుందేమోనన్న భయాలు కలుగుతుండడంతో చాలా మంది మానసికంగా కుంగిపోతున్నారు. చివరకు ఇది ఆత్మహత్యలకు దారితీస్తోంది. లాక్​డౌన్ వల్ల కరోనా తగ్గుతుందనుకుంటే రోజు రోజుకూ పెరుగుతుండడంతో అనిశ్చిత పరిస్థితులు నెలకొన్నాయి.

"భవిష్యత్తు పై స్పష్టత లేకుంటే ఆందోళన అధికమవుతుంది. ఇది తీవ్ర నిర్ణయాల దిశగా ప్రేరేపిస్తుంది" అని దిల్లీకి చెందిన సైకో థెరపిస్టు అర్విందర్ సింగ్ తెలిపారు. ఈ కారణంగానే కొందరు తమకు తాముగా గాయాలు చేసుకుంటుండగా, మరికొందరు ఏకంగా ప్రాణాలే తీసుకుంటున్నారు.

ఉదాహరణకు గుజరాత్​లో 108 సేవల సంస్థకు ఏప్రిల్ నుంచి జులై వరకు వచ్చిన ఫోన్ కాల్స్​లో 90 కేసులు ఆత్మహత్యకు సంబంధించినవి. సుమారు 800 ఫోన్ కాల్స్ సొంతంగా గాయాలు చేసుకున్న సంఘటనలవి. వీటన్నింటికీ ఆర్థిక, మానసిక కుటుంబ సమస్యలే కారణం. ఆర్థిక సమస్యల వల్లే ఆత్మహత్య చేసుకోవాలన్న ఆలోచన చేస్తున్నారని గుజరాత్​కు చెందిన మానసిక వైద్య నిపుణుడు ప్రశాంత్ భిమానీ తెలిపారు.