భారత్​లో 23 వేలు దాటిన కరోనా కేసులు

దేశవ్యాప్తంగా కరోనా వైరస్ కేసులు పెరిగాయి. ఇప్పటివరకు 23, 077 మందికి వైరస్ సోకింది. 718మంది ప్రాణాలు కోల్పోయారు. అత్యధికంగా మహారాష్ట్రలో 6,430 మందికి సోకింది. అక్కడ ఇప్పటివరకు 283మంది మృతి చెందారు.

భారత్​లో కరోనా బాధితుల సంఖ్య 23వేల మార్క్​ను దాటింది. 24 గంటల్లోనే 1,684 కొత్త కేసులు నమోదయ్యాయి. 37 మంది ప్రాణాలు కోల్పోయారు.

భారత్​లో కరోనా గణాంకాలు

వైరస్ బాధిత రాష్ట్రాల్లో మహారాష్ట్ర అగ్రస్థానంలో ఉంది. రాష్ట్రంలో 6,430మందికి కరోనా సోకింది. గుజరాత్​లో 2,624మంది, దిల్లీలో 2,376మంది వైరస్ బారినపడ్డారు. మహారాష్ట్రలో 283మంది, గుజరాత్​లో 112మంది, మధ్యప్రదేశ్​లో 83, దిల్లీలో 50 మంది కరోనాతో అసువులు బాశారు.

అయితే లాక్​డౌన్ కారణంగా కరోనా కేసులు తగ్గుముఖం పట్టాయని ప్రకటించింది కేంద్రం. ఒకరోజులో 6 శాతం మాత్రమే కేసుల్లో పెరుగుదల నమోదైందని.. మార్చి 27 తర్వాత ఇదే అత్యల్ప వృద్ధి అని పేర్కొంది.

కేరళలో నాలుగు నెలల చిన్నారి మృతి..

కేరళ మలప్పురానికి చెందిన ఓ చిన్నారి కరోనా కారణంగా ప్రాణాలు కోల్పోయింది. కోజికోడ్ వైద్య కళాశాల ఆసుపత్రిలో చికిత్స పొందుతూ మృతి చెందింది. మూడు నెలలుగా నిమోనియా, గుండె సంబంధిత సమస్యలతో చిన్నారి బాధపడుతుందని వైద్యులు వెల్లడించారు.

బిహార్​లో మరో ఆరుగురికి..

బిహార్​లో మరో ఆరుగురికి కరోనా సోకిందని రాష్ట్ర ప్రభుత్వం ప్రకటించింది. దీంతో వైరస్ బాధితుల సంఖ్య అక్కడ 176కు చేరుకుంది. ఇప్పటివరకు ఇద్దరు ప్రాణాలు కోల్పోయారు.

ఇదీ చూడండి:కరోనాపై గొప్ప సందేశమిస్తోన్న 6 నెలల చిన్నారి!