'బంగాల్​ దంగల్'​కు కాంగ్రెస్​ వ్యూహరచన

బంగాల్​ ఎన్నికలు సమీపిస్తున్న తరుణంలో పార్టీ సన్నద్ధతను సమీక్షించేందుకు శుక్రవారం కాంగ్రెస్​ భేటీకానుంది. రాహుల్​ గాంధీ అధ్యక్షత వర్చువల్​గా ఈ సమావేశం జరగనుంది. రాష్ట్రంలో పార్టీ ఉనికి ప్రశ్నార్థకంగా మారిన తరుణంలో ఎన్నికల్లో రాణించేందుకు చేపట్టాల్సిన చర్యలు, వ్యూహాలపై నేతలు చర్చించనున్నారు.

వచ్చే ఏడాది బంగాల్ అసెంబ్లీ​ ఎన్నికలు జరగనున్న తరుణంలో.. పార్టీ సన్నద్ధతపై కాంగ్రెస్​ సీనియర్​ నేత రాహుల్​ గాంధీ శుక్రవారం సమీక్ష నిర్వహించనున్నారు. వర్చువల్​గా జరిగే ఈ భేటీలో బంగాల్​ కాంగ్రెస్​ అధ్యక్షుడు అధిర్​ రంజన్​ చౌదరి, బంగాల్​ ఇన్​ఛార్జ్​ జితిన్​ ప్రసాద, సీఎల్​పీ నేత అబ్దుల్​ మన్నన్​ పాల్గొననున్నారు.

కాంగ్రెస్​ వ్యూహమేంటి?

294 సభ్యుల బంగాల్​ శాసనసభకు వచ్చే ఏడాది పోలింగ్​ జరగనుంది. రాష్ట్రంపై భాజపా పట్టు పెరుగుతున్న తరుణంలో అధికారాన్ని నిలబెట్టుకోవడం తృణమూల్​ కాంగ్రెస్​కు సవాలుగా మారింది. మరోవైపు రాష్ట్రంలో కాంగ్రెస్​ ఉనికి ప్రశ్నార్థకంగా మారింది. ఈ నేపథ్యంలో పార్టీని బలోపేతం చేసి ఎన్నికల్లో రాణించేందుకు కాంగ్రెస్​ ఎలాంటి చర్యలు చేపడుతుందనేది కీలకంగా మారింది.

2016 ఎన్నికల్లో వామపక్షాలతో కలిసి బరిలో దిగిన కాంగ్రెస్​.. 44 స్థానాలు దక్కించుకుని రెండో అతిపెద్ద పార్టీగా అవతరించింది. అయితే ఆ తర్వాత సగం మంది కాంగ్రెస్​ ఎమ్మెల్యేలు టీఎంసీ తీర్థం పుచ్చుకున్నారు.

ఇదీ చూడండి:-బంగాల్​ దంగల్​: దీదీ సేనలో అసమ్మతి జ్వాల!

ఈసారి పొత్తు వ్యవహారంలో మరింత అనిశ్చితిలోకి జారుకుంది కాంగ్రెస్​. టీఎంసీతో కలిసి ముందుకు వెళ్లాలా? లేక వామపక్షాలతోనే కొనసాగాలా? అన్న విషయంపై నేతలు మంతనాలు జరుపుతున్నారు.

సీడబ్ల్యూసీ భేటి..

కాంగ్రెస్​లోని కీలక నేతలు అహ్మద్​ పటేల్​, తరుణ్​ గొగొయి​.. వారం రోజుల వ్యవధిలో కన్నుమూశారు. వీరికి నివాళులర్పించేందుకు కాంగ్రెస్​ వర్కింగ్​ కమిటీ శుక్రవారం భేటీ కానుంది. ఉదయం 11గంటలకు వర్చువల్​గా జరగనున్న ఈ కార్యక్రమంలో సీడబ్ల్యూసీ సభ్యులు, శాశ్వత ఆహ్వానితులతో పాటు ఇతరులు పాల్గొంటారని పార్టీ ఓ ప్రకటన ద్వారా తెలిపింది.

ఇదీ చూడండి:-'ఫార్ములా 23'తో భాజపా 'బంగాల్​ మిషన్​-200'