ఇందిరా గాంధీకి కాంగ్రెస్ ప్రముఖుల ఘన నివాళి

మాజీ ప్రధాని దివంగత ఇందిరా గాంధీకి నివాళులు అర్పించారు కాంగ్రెస్ ప్రముఖ నేతలు సోనియా గాంధీ, ప్రణబ్ ముఖర్జీ, మన్మోహన్ సింగ్. దిల్లీలోని శక్తి స్థల్​లో నిర్వహించిన కార్యక్రమంలో ఇందిరాగాంధీకి పూలతో శ్రద్ధాంజలి ఘటించారు.

మాజీ ప్రధాని దివంగత ఇందిరా గాంధీ 35వ వర్ధంతి సందర్భంగా.. కాంగ్రెస్​ ప్రముఖులు నివాళులు అర్పించారు. జాతీయ భద్రత, ఆర్థిక, విదేశీ విధానాలకు సంబంధించి ఆమె సాధించిన విజయాలను ఈ సందర్భంగా గుర్తు చేసుకున్నారు.

దిల్లీలో ఇందిరా స్మారకం శక్తిస్థల్​లో జరిగిన కార్యక్రమానికి మాజీ రాష్ట్రపతి ప్రణబ్ ముఖర్జీ, మాజీ ఉప రాష్ట్రపతి హమిద్ అన్సారీ, మాజీ ప్రధాని మన్మోహన్​ సింగ్, కాంగ్రెస్ అధ్యక్షురాలు సోనియా గాంధీ హాజరయ్యారు. ఇందిరా గాంధీకి పూలతో శ్రద్ధాంజలి ఘటించారు. రాజస్థాన్​ ముఖ్యమంత్రి అశోక్ గెహ్లోత్​తో పాటు కాంగ్రెస్ ఎంపీలు, కార్యకర్తలు శక్తి స్థల్​కు భారీగా చేరుకున్నారు.

ఇందిరా గాంధీ మనుమడు, కాంగ్రెస్ అగ్రనేత రాహుల్ గాంధీ కూడా నివాళులు అర్పించారు. నానమ్మకు నివాళులు చెబుతూ ట్వీట్ చేశారు రాహుల్.

1984 అక్టోబర్​ 31 ఉదయం ఇందిరా గాంధీని.. అక్బర్​ రోడ్డులోని అధికార నివాసంలో ఆమె అంగరక్షకులే హత్య చేశారు.