22:58 July 24
ప్రభుత్వానికి గవర్నర్ కార్యాలయం లేఖ
శాసనసభ సమావేశాల నిర్వహణపై ప్రభుత్వం చేసిన విజ్ఞప్తికి సమాధానమిచ్చింది గవర్నర్ కార్యాలయం. సభలు నిర్వహించాలని అతిస్వల్ప వ్యవధిలో కోరినట్లు వెల్లడించింది. ప్రభుత్వ విజ్ఞప్తిని న్యాయ నిపుణులు పరిశీలించారని.. ఇంత స్వల్ప వ్యవధితో సమావేశాలు నిర్వహించడం సాధ్యం కాదని తెలిపింది. అసెంబ్లీ నిర్వహణకు సాధారణంగా 21 రోజుల ముందు తెలపాల్సి ఉంటుందని స్పష్టం చేసింది. అందరు ఎమ్మెల్యేలు స్వేచ్ఛగా ఉన్నారనే అంశమై రాష్ట్ర ప్రభుత్వం హామి ఇవ్వాలని కోరింది.
21:39 July 24
గహ్లోత్కు గవర్నర్ లేఖ..
రాజస్థాన్ గవర్నర్ కల్రాజ్ మిశ్రా ముఖ్యమంత్రి అశోక్ గహ్లోత్కు లేఖ రాశారు. అసెంబ్లీ సమావేశం నిర్వహించే అంశమై నిపుణులతో తాను చర్చించాల్సి ఉందని.. అంతలోనే ప్రజలు రాజ్భవన్ను ఘోరావ్ చేస్తే తమది బాధ్యత కాదని సీఎం బహిరంగ ప్రకటన చేయడం సరికాదని లేఖలో అభిప్రాయపడ్డారు. మీ నేతృత్వంలోని హోంశాఖ గవర్నర్నే కాపాడలేకపోతే రాష్ట్రంలో శాంతి, భద్రతల మాటేమిటని ఆందోళన వ్యక్తం చేశారు. రాజ్భవన్లో ఎమ్మెల్యేలు ధర్నా చేయడం తప్పుడు సంప్రదాయాన్ని ప్రారంభించడం కాదా అని ప్రశ్నించారు.
21:16 July 24
తిరుగుబాటు ఎమ్మెల్యేలకు నోటీసులు
కాంగ్రెసె రెబల్ ఎమ్మెల్యేలు తన్వీర్ సింగ్, బల్వంత్ సింగ్, దిగ్విజయ సింగ్, కర్ణి సింగ్లకు రాజస్థాన్ ఎస్ఓజీ బృందం నోటీసులు జారీ చేసింది. ఎమ్మెల్యేలు విశ్వేంద్ర సింగ్, భన్వర్ లాల్ శర్మకు అవినీతి నిరోధక శాఖ తాకీదులు ఇచ్చింది.
20:05 July 24
రాజ్భవన్ను వీడిన నేతలు
ముఖ్యమంత్రి గహ్లోత్ నేతృత్వంలో రాజ్భవన్లో ఐదుగంటల పాటు బైఠాయించిన ఎమ్మెల్యేలు.. ధర్నాను విరమించి తిరుగుపయనమయ్యారు. అసెంబ్లీ సమావేశం నిర్వహించేందుకు గవర్నర్ అంగీకరించిన నేపథ్యంలో గవర్నర్ అధికారిక నివాసాన్ని వీడారు.
20:01 July 24
రాత్రి 9.30కు రాజస్థాన్ కేబినెట్
రాజకీయ సంక్షోభం నేపథ్యంలో ప్రభుత్వ వైఖరిపై నిర్ణయం తీసుకునేందుకు రాత్రి 9.30 గంటలకు సమావేశం కానుంది రాజస్థాన్ కేబినెట్. తమ నిర్ణయాన్ని నేడే గవర్నర్కు పంపించనున్నట్లు సమాచారం.
18:00 July 24
రాజ్భవన్లో రాజకీయం
పైనుంచి ఒత్తిళ్లు ఉన్నందువల్లే గవర్నర్ అసెంబ్లీ నిర్వహణకు అడ్డుతగులుతున్నట్లు పేర్కొన్నారు సీఎం గహ్లోత్. తమ డిమాండ్లను నెరవేర్చేవరకు రాజ్భవన్ ఆవరణలో ధర్నాకు కూర్చుంటున్నట్లు ప్రకటించారు. ఈ మేరకు కాంగ్రెస్ ఎమ్మెల్యేలు రాజ్భవన్ ఆవరణలో బైఠాయించారు.
సమావేశాల నిర్వహణపై గురువారమే నిర్ణయం తీసుకోవాల్సి ఉందని పేర్కొన్న గహ్లోత్.. సభల నిర్వహణకు అవసరమైన ఆదేశాలను జారీ చేయాలని మరోసారి గవర్నర్ను కలిసినట్లు వెల్లడించారు. గవర్నర్ ఒత్తిళ్లకు తలొగ్గబోరని.. సభల నిర్వహణకు అనుమతిస్తారని ఆశాభావం వ్యక్తం చేశారు.
17:33 July 24
'భాజపా ఆతిథ్యం నిజం కాదు'
ముఖ్యమంత్రి అశోక్ గహ్లోత్ ఆరోపిస్తున్నట్లుగా తమకు దిల్లీలో భాజపా ఆతిథ్యం ఇవ్వడం లేదని పేర్కొన్నారు పైలట్ వర్గానికి చెందిన ఎమ్మెల్యేలు. వారి సొంత నిర్ణయానికి అనుగుణంగానే క్యాంప్లో ఉన్నట్లు పేర్కొన్నారు. తమ నియోజకవర్గాల అభివృద్ధికి సంబంధించిన డిమాండ్లను సీఎం నెరవేర్చని కారణంగానే అసమ్మతి బాట పట్టినట్లు వెల్లడించారు.
15:29 July 24
గవర్నర్తో సీఎం గహ్లోత్ భేటీ
రాజస్థాన్ ముఖ్యమంత్రి అశోక్ గహ్లోత్ రాష్ట్ర గవర్నర్ కల్రాజ్ మిశ్రాతో భేటీ అయ్యారు. తన వర్గం ఎమ్మెల్యేలతో కలసి రాజ్భవన్కు వెళ్లిన ఆయన అసెంబ్లీ సమావేశాల నిర్వహణపై మరోసారి గవర్నర్కు విజ్ఞప్తి చేశారు.
15:28 July 24
రాజస్థాన్ రాజకీయం మరో మలుపు తిరిగింది. శాసనసభ సమావేశాల నిర్వహణకు అనుమతించకూడదని రాష్ట్ర గవర్నర్ కల్రాజ్ మిశ్రాపై రాజకీయ ఒత్తిళ్లు ఉన్నట్లు ముఖ్యమంత్రి అశోక్ గహ్లోత్ వ్యాఖ్యానించారు. సమావేశాల కోసం రాష్ట్రప్రభుత్వం.. గవర్నర్కు ఇప్పటికే విజ్ఞప్తి చేసినప్పటికీ ఆయన అందుకు సంబంధించిన ఆదేశాలు జారీ చేయడం లేదని వెల్లడించారు.
"మేం వచ్చే సోమవారం నుంచి శాసనసభ సమావేశాలు నిర్వహించాలనుకుంటున్నాం. గవర్నర్ ఇందుకు సంబంధించిన ఆదేశాలు జారీ చేయడం లేదు. గత రాత్రే శాసనసభ నిర్వహణకు ఆదేశాలు విడుదల అవుతాయని మేం భావించాం. దీనిపై రాత్రంతా వేచిచూసినప్పటికీ గవర్నర్ వద్దనుంచి ఎలాంటి స్పందన రాలేదు."
-అశోక్ గహ్లోత్, రాజస్థాన్ ముఖ్యమంత్రి
గవర్నర్ రాజ్యాంగబద్ధమైన పదవిలో ఉన్నారని.. ఆ పోస్టు గౌరవానికి భంగం కలగకుండా సభల నిర్వహణకు వెంటనే చర్యలు తీసుకోవాలని గహ్లోత్ కోరారు. లేదంటే తమ వర్గానికి చెందిన శాసనసభ్యులతో కలిసి గవర్నర్ను కలిసి విజ్ఞప్తి చేస్తామన్నారు. అప్పటికీ సభల నిర్వహణపై స్పష్టత రాకపోతే.. ప్రజలు రాజ్భవన్ను ఘెరావ్ చేసే అవకాశం ఉందని.. దానికి బాధ్యత తమది కాదని చెప్పారు.
12:57 July 24
12:21 July 24
గవర్నర్తో రాజస్థాన్ సీఎం గహ్లోత్ భేటీ
రాజస్థాన్ ముఖ్యమంత్రి అశోక్ గహ్లోత్ పార్టీ ఎమ్మెల్యేలతో కలసి కాసేపట్లో గవర్నర్ను కలవనున్నారు.