కాంగ్రెస్​లో '100 లేఖల' దుమారం- ఏది నిజం?

కాంగ్రెస్ నాయకత్వాన్ని మార్చాలని​ అధినేత్రి సోనియా గాంధీకి 100కు పైగా లేఖలు వచ్చాయని పార్టీ బహిష్కృత నేత సంజయ్ ఝా ఆరోపణలతో దుమారం చెలరేగింది. సీడబ్ల్యూసీ ఎన్నికలు పారదర్శకంగా నిర్వహించాలని 100 మంది నేతలు కోరినట్లు ఝా ఆరోపించారు. ఈ వ్యాఖ్యలను కాంగ్రెస్ ప్రధాన ప్రతినిధి రణ్​దీప్ సుర్జేవాలా ఖండించారు. భాజపా ఆదేశాల మేరకే ఆరోపణలు చేస్తున్నారని మండిపడ్డారు.

కాంగ్రెస్​లో 'నాయకత్వ శూన్యత'పై ఆ పార్టీ బహిష్కృత నేత సంజయ్​ ఝా చేసిన ఆరోపణలు తీవ్ర దుమారానికి కారణమయ్యాయి. కాంగ్రెస్ సారథిని మార్చాలని పార్టీలోని 100 మంది నేతలు అధినేత్రి సోనియా గాంధీకి లేఖలు రాశారని సంజయ్ ఆరోపించారు. అధ్యక్ష పదవికి రాహుల్​ గాంధీ రాజీనామా తర్వాత కాంగ్రెస్​లో నెలకొన్న పరిస్థితిపై నేతలు అసంతృప్తి వ్యక్తం చేసినట్లు పేర్కొన్నారు.

"పార్టీ అంతర్గత వ్యవహారాలపై నిరాశ వ్యక్తం చేస్తూ దాదాపు 100 మంది కాంగ్రెస్ నేతలు సోనియాగాంధీకి లేఖలు రాశారు. రాజకీయ నాయకత్వాన్ని మార్చి, పారదర్శకంగా కాంగ్రెస్​ వర్కింగ్ కమిటీ ఎన్నికలు నిర్వహించాలని కోరారు."

-సంజయ్ ఝా ట్వీట్

అయితే ఈ వ్యాఖ్యలను కాంగ్రెస్ ప్రధాన ప్రతినిధి రణ్​దీప్ సుర్జేవాలా ఖండించారు. ఫేస్​బుక్ వివాదం(భాజపాకు ఫేస్​బుక్​ అనుకూలంగా వ్యవహరిస్తోందన్న ఆరోపణల) నుంచి దృష్టి మరల్చేందుకే భాజపా ఈ విషయాలను ప్రేరేపిస్తోందని ఆరోపించారు.

"ఫేస్​బుక్-భాజపా లింకుల గురించి దృష్టిమరల్చేందుకు అసలు ఉనికిలోనే లేని లేఖల గురించి ప్రస్తావించాలని 'ప్రత్యేక తప్పుడు సమాచార గ్రూప్'​ వాట్సాప్​లో ఆదేశించింది. భాజపా మనుషులు ఈ ఆదేశాల ప్రకారమే నడుచుకుంటున్నారు."

-రణ్​దీప్ సుర్జేవాలా, కాంగ్రెస్ ప్రతినిధి

కాంగ్రెస్ తన అధికారిక ప్రకటనలో సైతం లేఖల విషయాన్ని ఖండించింది. ప్రస్తుతం ఝా.. కాంగ్రెస్ ప్రతినిధి కాదని పేర్కొంది. ఫేస్​బుక్​కు, భాజపాకు మధ్య ఉన్న లింకుల విషయంపై దృష్టిమరల్చేందుకే అధికార పార్టీ ఆదేశాల మేరకు వదంతులు వ్యాప్తి చేస్తున్నారని స్పష్టం చేసింది.

మరోవైపు సామాజిక మాధ్యమాలను భాజపా మభ్యపెడుతోందని కాంగ్రెస్ ఆరోపించింది. ఈ మేరకు 'ఫేస్​బుక్ విద్వేష ప్రసంగాల నియమాలు భారత రాజకీయాలతో కలిసిపోయాయి- వివాదాస్పద రాజకీయ నేతపై నిషేధం విధించేందుకు సంస్థ ఎగ్జిక్యూటివ్ వ్యతిరేకించారు' అనే వార్తను కాంగ్రెస్ ప్రస్తావించింది.

సస్పెండ్

పార్టీ అంతర్గత వ్యవహారాలపై విమర్శలు చేసినందుకు ఝాను గత నెలలో కాంగ్రెస్ సస్పెండ్ చేసింది. అయితే పార్టీలో అసంతృప్తులు ఉన్నారని సంజయ్ పేర్కొనడం ఇదే తొలిసారేం కాదు. పార్టీలో ఎన్నికలు నిర్వహించాలని ఇదివరకే పలుమార్లు నొక్కిచెప్పారు.

ఇదీ చదవండి-'పద్మ విభూషణ్'​ పండిట్​ జస్​రాజ్​ ఇకలేరు