'ఆయన అవినీతికి ప్రతిరూపం.. మాజీ జైలు పక్షి'

కర్ణాటక ముఖ్యమంత్రిగా నేడు ప్రమాణస్వీకారం చేయనున్న యడ్యూరప్పపై తీవ్ర విమర్శలు చేశాయి కాంగ్రెస్​, జేడీఎస్​. రాజ్యాంగ విరుద్ధంగా ప్రభుత్వ ఏర్పాటుకు అవకాశమిచ్చారని గవర్నర్​నూ తప్పుబట్టారు సంకీర్ణ కూటమి నేతలు. తగిన సంఖ్యాబలం లేకున్నా... ప్రభుత్వ ఏర్పాటుకు అవకాశమివ్వడం రాజ్యాంగంలోని ఏ అధికరణలో ఉందో చెప్పాలని సిద్ధరామయ్య ప్రశ్నించారు.

కర్ణాటకలో భాజపా ప్రభుత్వ ఏర్పాటుకు అవకాశమిచ్చిన గవర్నర్​, కోరిన యడ్యూరప్పపై కాంగ్రెస్​, జేడీఎస్​ విమర్శలు గుప్పించాయి. రాజ్యాంగ విరుద్ధంగా యడ్యూరప్పను ప్రభుత్వం ఏర్పాటు చేయాలని ఆహ్వానించడం ద్వారా​ పార్లమెంటరీ ప్రజాస్వామ్యాన్ని గవర్నర్ ఖూనీ చేశారని ఆరోపించారు ఇరు పార్టీల నేతలు.

అవినీతికి ప్రతిరూపం​, మాజీ జైలు పక్షి అంటూ యడ్యూరప్పను ఎద్దేవా చేసింది కర్ణాటక కాంగ్రెస్​. యడ్యూరప్ప జైలుకెళ్లగా ముగిసిన 2008-11 మధ్య కాలంలోని ఘోరమైన పాలనను కన్నడ ప్రజలు ఇప్పట్లో మరిచిపోలేరని వ్యాఖ్యానించింది.

'' 'అవినీతికి మారుపేరు, మాజీ జైలు పక్షి' యడ్యూరప్ప.. ఎమ్మెల్యేలను కొనుగోలు చేసే అద్భుతమైన నైపుణ్యంతో ప్రజాస్వామ్యాన్ని భ్రష్టు పట్టించారు.''

- కర్ణాటక కాంగ్రెస్​ ట్వీట్​

ఎలాంటి సందేహం వ్యక్తం చేయకుండా.. యడ్యూరప్ప ప్రమాణ స్వీకారానికి అనుమతి ఇవ్వడం ప్రజాస్వామ్యానికి విరుద్ధమని గవర్నర్​ నిర్ణయాన్ని తప్పుబట్టింది జేడీఎస్​.

''ముగ్గురు శాసనసభ్యులపై అనర్హత వేటుతో సభలో శాసనసభ్యుల సంఖ్య 222. ప్రభుత్వం ఏర్పాటుకు అవసరమైన సంఖ్యాబలం 112. అయినా.. 105 మంది ఎమ్మెల్యేలున్న యడ్యూరప్ప ప్రభుత్వ ఏర్పాటు కోసం గవర్నర్​ను ఎలా కలుస్తారు. ''

- జేడీఎస్​ ట్వీట్​

ఏ ఆర్టికల్​ చెబుతోంది...

కన్నడ అసెంబ్లీ భాజపా ప్రయోగాలకు వేదికగా మారిందని తీవ్ర విమర్శలు చేశారు కాంగ్రెస్​ శాసనసభాపక్ష నేత సిద్ధరామయ్య. 105 మంది సభ్యులతో ఉన్న భాజపా... తగిన సంఖ్యాబలానికి చాలా దూరంలో ఉందన్నారాయన.

''రాజ్యాంగ విరుద్ధంగా ప్రభుత్వం ఏర్పాటు చేయాలని ప్రయత్నిస్తున్న కర్ణాటక భాజపాకు.. ఆ పార్టీకి అనుకూలంగా ఉన్న గవర్నర్​కు కన్నడ అసెంబ్లీ ప్రయోగశాలగా మారింది. మెజార్టీ లేకుండా ఏదైనా పార్టీని ప్రభుత్వ ఏర్పాటుకు ఆహ్వానించమని రాజ్యాంగంలోని ఏ అధికరణ​ చెబుతోంది. ఇది హేయమైన చర్య. రాజ్యాంగాన్ని అనుసరిస్తే భాజపా ప్రభుత్వం ఏర్పాటు చేసేందుకు అవకాశమే లేదు.''

- సిద్ధరామయ్య, కాంగ్రెస్​ శాసనసభాపక్ష నేత

కన్నడ నాట కాంగ్రెస్​-జేడీఎస్​ సంకీర్ణ ప్రభుత్వం కూలిపోయిన రెండు రోజుల అనంతరం.. ప్రభుత్వ ఏర్పాటుకు ఆహ్వానించాలంటూ గవర్నర్​ను కోరారు యడ్యూరప్ప. నేడు ప్రమాణస్వీకారానికి అంగీకరించిన గవర్నర్​ వాజుభాయ్​ వాలా... జులై 31 వరకు సభలో బలం నిరూపించుకోవాలని యడ్డీకి గడువు విధించారు.