'మోదీ సిద్ధాంతం విభజించి.. పాలించడం'

ప్రధాని నరేంద్ర మోదీ దేశాన్ని విభజించి.. పాలిస్తున్నారని కాంగ్రెస్ అధికార ప్రతినిధి రణదీప్​ సుర్జేవాలా విమర్శించారు. ప్రఖ్యాత టైమ్​ మ్యాగజైన్​లో మోదీపై ముఖచిత్ర కథనం ఆధారంగా ఈ విమర్శలు చేశారు.

ప్రధాని నరేంద్ర మోదీ దేశాన్ని విభజించి, పాలిస్తున్నారని కాంగ్రెస్ పార్టీ తీవ్ర విమర్శలు చేసింది. ప్రముఖ మ్యాగజైన్​ 'టైమ్​' తన తాజా అంతర్జాతీయ సంచికలో ప్రధాన మంత్రి నరేంద్ర మోదీపై ముఖచిత్ర కథనాన్ని ప్రచురించింది. ఇండియాస్​ డివైడర్​ ఇన్​ ఛీఫ్​ అంటూ పతాక శీర్షికను పెట్టింది. ఈ కథనాన్ని ఉద్దేశించి కాంగ్రెస్​ మోదీపై మాటల దాడికి దిగింది.

ఈ విషయంపై కాంగ్రెస్ అధికార ప్రతినిధి రణదీప్ సుర్జేవాలా ట్విట్టర్​ వేదికగా స్పందించారు.

"మోదీ సిద్ధాంతం- దేశాన్ని విభజించి, పాలించడం. బ్రిటీష్​వారి నుంచి భారతదేశానికి కాంగ్రెస్​ విముక్తి కల్పించింది. ఇప్పుడు మోదీ నుంచి కూడా విముక్తి కల్పిస్తాం."- రణదీప్​ సుర్జేవాలా, కాంగ్రెస్ అధికార ప్రతినిధి

ఎన్నికల వేళ...

టైమ్​ మ్యాగజైన్​ తన 2019, మే 20 అంతర్జాతీయ సంచికలో మోదీని ఉద్దేశిస్తూ, 'ఇండియాస్ డివైడర్ ఇన్​ చీఫ్' అనే శీర్షికతో ఓ కథనం ప్రచురించింది. ఇది ఐరోపా​, మధ్య ప్రాచ్యం​, ఆఫ్రికా, ఆసియా, దక్షిణ పసిఫిక్ ప్రాంతాలకు వెళ్లిన అంతర్జాతీయ సంచిక​లో ఉంది. ఈ కథనాన్ని రాసింది అతీష్​ తసీర్.

ఈ కథనంలో భారత ప్రతిపక్షపార్టీ కాంగ్రెస్ వంశపారంపర్య పాలనా సూత్రం తప్ప దేశానికి మరేమీ అందించలేదని వ్యాఖ్యానించింది.

మరో కథనం 'మోదీ ది రిఫార్మర్​'ని యూరేషియా గ్రూప్​ వ్యవస్థాపకుడు, అధ్యక్షుడైన ఇయాన్​ బ్రెమర్​ రచించారు. భారత్​లో సార్వత్రిక ఎన్నికలు చివరి దశకు చేరుకున్న తరుణంలో ఈ కథనాలు ప్రచురితం కావడం గమనార్హం.

ఇదీ చూడండి: మరోసారి చిక్కుల్లో కాంగ్రెస్​ నేత సిద్ధూ..