ప్రభుత్వ ఏర్పాటుకు భాజపాతో చేతులు కలిపి ఎన్సీపీ నేత అజిత్ పవార్ శివసేనకు వెన్నుపోటు పొడిచారని విమర్శించారు ఆ పార్టీ ఎంపీ సంజయ్ రౌత్. అజిత్ పవార్ చేసిన పనిని మహారాష్ట్ర ప్రజలు ఎన్నటికీ క్షమించరన్నారు.
"శివసేనను అజిత్ పవార్ వెన్నపోటు పొడిచారు. ప్రభుత్వం ఏర్పాటు చేయడానికి భాజపాతో చేతులు కలపడం ద్రోహం. అజిత్ పవార్ నిర్ణయానికి ఎన్సీపీ అధ్యక్షుడు శరద్ పవార్ ఆమోదం తెలపలేదు."-సంజయ్ రౌత్
ఎన్సీపీ అధినేత శరద్ పవార్, శివసేన అధ్యక్షుడు ఉద్ధవ్ ఠాక్రేలతో ఉమ్మడిగా మీడియా సమావేశం నిర్వహిస్తామని వెల్లడించారు సంజయ్.
దుర్వినియోగం చేశారు...
మహారాష్ట్ర ఉపముఖ్యమంత్రిగా బాధ్యతలు స్వీకరించిన అజిత్ పవార్పై ఎన్సీపీ నేత నవాబ్ మాలిక్ విమర్శలు గుప్పించారు. ఎమ్మెల్యేల హాజరుకోసం తీసుకున్న సంతకాలను దుర్వినియోగం చేశారని ఆరోపించారు.
ఆశ్చర్యం...
మహారాష్ట్రలో భాజపా, ఎన్సీపీలు ప్రభుత్వం ఏర్పాటు చేసిన విషయంపై కాంగ్రెస్ సీనియర్ నేత అభిషేక్ సింఘ్వీ స్పందించారు. ఈ అనూహ్య ఘటనపై ఆశ్చర్యం వ్యక్తం చేసిన ఆయన కాంగ్రెస్, శివసేన, ఎన్సీపీల మధ్య చర్చలు సుదీర్ఘంగా జరిగాయని వ్యాఖ్యనించారు. దీంతో వచ్చిన అవకాశాన్ని కొందరు వేగంగా అందుకున్నారని అన్నారు.
"నిజంగా చెప్తున్నా...మహారాష్ట్రలో ప్రభుత్వ ఏర్పాటు విషయంపై వచ్చిన వార్తలు అసత్యమని ముందుగా భావించాను. మా మధ్య చర్చలు మూడు రోజుల కన్నా ఎక్కువ జరగాల్సింది కాదు. చాలా ఆలస్యమైంది. వేగంగా స్పందించి వచ్చిన అవకాశాన్ని ఉపయోగించుకున్నారు. పవార్జీ మీరు చాలా గ్రేట్"-సింఘ్వి ట్వీట్
