'వలస' కష్టాలపై విపక్షాల భేటీ- కాంగ్రెస్​ నేతృత్వం

లాక్​డౌన్​ నేపథ్యంలో కార్మికుల కష్టాలపై చర్చించేందుకు కాంగ్రెస్ పార్టీ.. భావసారూప్య పార్టీలతో కలిసి శుక్రవారం సమావేశం ఏర్పాటు చేయనుంది. వలస కూలీలు, కార్మిక చట్టాల సవరణలపై చర్చించేందుకు ఈ భేటీని నిర్వహిస్తున్నట్లు సమాచారం.

వలస కూలీల కష్టాలు, కార్మిక చట్టాల సంస్కరణలకు సంబంధించి ఇతర విపక్షాలతో చర్చించేందుకు కాంగ్రెస్ సిద్ధమైంది. ఈ మేరకు భావసారూప్య పార్టీలు కలిసి రావాలని కోరినట్లు విశ్వసనీయ వర్గాల సమాచారం.

శుక్రవారం జరిగే ఈ సమావేశానికి కాంగ్రెస్ అధినేత్రి సోనియా గాంధీ అధ్యక్షత వహిస్తారు. వీడియో కాన్ఫరెన్స్​ ద్వారా జరిగే ఈ భేటీలో 17 విపక్ష పార్టీల అధినేతలు పాల్గొననున్నట్లు తెలుస్తోంది. బంగాల్​ ముఖ్యమంత్రి మమతా బెనర్జీ కూడా ఈ భేటీకి హాజరవుతున్నారు. సమాజ్​వాదీ పార్టీ, బహుజన్​ సమాజ్​ పార్టీ నుంచి ఇంకా ఎటువంటి సమాచారం లేదు.

దేశమంతా పాదయాత్రలు..

లాక్​డౌన్​ కారణంగా చాలామంది వలస కూలీలు ఉపాధి కోల్పోవటం వల్ల స్వస్థలాలకు వెళ్లేందుకు ప్రయత్నించారు. అనేకమంది పాదయాత్రల ద్వారా వందల కిలోమీటర్లు ప్రయాణించారు. ఈ ప్రక్రియలో కొంత మంది మృత్యువాత పడ్డారు. ఈ సంక్షోభ సమయంలో వలస కూలీల పట్ల ప్రభుత్వం నిర్లక్ష్యం వహించిందని ప్రతిపక్షాలు విమర్శించాయి.

కార్మిక చట్టాలపై..

ఇదే సమయంలో భాజపా పాలిత ఉత్తర్​ప్రదేశ్​, మధ్యప్రదేశ్​, గుజరాత్​లో కార్మిక చట్టాలను సవరించడాన్ని కాంగ్రెస్ సహా విపక్షాలన్నీ తప్పుబట్టాయి. విదేశీ పెట్టుబడులను ఆకర్షించేందుకు కార్మికుల ప్రాథమిక హక్కులను పణంగా పెడుతున్నారని కేంద్రంపై మండిపడ్డాయి.

ఈ సవరణల ప్రకారం..

కార్మికుల సంక్షేమ చట్టాల నుంచి పారిశ్రామిక కేంద్రాలకు మినహాయింపు ఉంటుంది. ఫలితంగా పనిగంటలు పెంచేందుకు యాజమాన్యాలకు అవకాశం లభిస్తుందని... దీన్ని వ్యతిరేకిస్తూ న్యాయస్థానాన్ని ఆశ్రయించే హక్కును కార్మికులు కోల్పోతారని విశ్లేషకులు అంటున్నారు.