'కుల్​భూషణ్​ను కాపాడేందుకు కట్టుబడి ఉన్నాం'​

పాకిస్థాన్​ జైలులో ఉన్న భారత నౌకాదళ మాజీ అధికారి కుల్​భూషణ్​ జాదవ్​ను కాపాడేందుకు భారత్​ కట్టుబడి ఉందని స్పష్టం చేసింది కేంద్రం. ఏకపక్షంగా నిర్ణయం తీసుకుంటూ.. భారత్​కు ఉన్న మార్గాలను పాక్​ అడ్డుకుంటోందని ఆగ్రహం వ్యక్తం చేసింది.

పాకిస్థాన్​లో శిక్ష అనుభవిస్తున్న నౌకాదళ మాజీ అధికారి కుల్​భూషణ్​ జాదవ్​ను కాపాడేందుకు కట్టుబడి ఉన్నామని పేర్కొంది భారత్​. కుల్​భూషణ్​ కేసులో పాకిస్థాన్​ దాఖలు చేసిన పునఃసమీక్షా పిటిషన్​ విచారణ చేపట్టేందుకు ఇస్లామాబాద్​ హైకోర్టు ద్విసభ్య ధర్మాసనం ఏర్పాటు చేసిన నేపథ్యంలో ఈ మేరకు వెల్లడించింది.

అంతర్జాతీయ న్యాయస్థానం​ తీర్పు మేరకు జాదవ్​కు ఎలాంటి అడ్డంకులు లేని న్యాయ సహాయం అందించటంలో పాకిస్థాన్​ విఫలమైందని విమర్శించారు విదేశాంగ శాఖ ప్రతినిధి అనురాగ్​ శ్రీవాస్తవ.

" కుల్​భూషణ్​ జాదవ్​ను కాపాడేందుకు మేము కట్టుబడి ఉన్నాం. ఈ విషయంలో మేము స్పష్టమైన వైఖరితో ఉన్నాం. ఈ కేసులో భారత్​కు అందుబాటులో ఉన్న సమర్థవంతమైన నివారణ మార్గాలను పాక్​ అడ్డుకుంటోంది."

- అనురాగ్​ శ్రీవాస్తవ, విదేశాంగ శాఖ ప్రతినిధి.

జాదవ్​కు న్యాయ ప్రతినిధిని నియమించాలని కోరుతూ.. పాక్​ ఏకపక్షంగా ఈనెల 22న ఇస్లామాబాద్​ హైకోర్టులో పిటిషన్​ దాఖలు చేసింది. పిటిషన్​ దాఖలు చేసే ముందు ఈ కేసులో ప్రధాన పార్టీ అయిన భారత్​తో ఎలాంటి సంప్రదింపులు జరపకుండానే నిర్ణయం తీసుకుంది.

ఇదీ చూడండి: కుల్​భూషణ్​కు​​ దౌత్య సాయంతో పాక్​ మళ్లీ వక్రబుద్ధి