చిన్మయానంద్ను 7 గంటలపాటు విచారించిన సిట్ అత్యాచార ఆరోపణలు ఎదుర్కొంటున్న కేంద్ర మాజీ మంత్రి, భాజపా నేత స్వామి చిన్మయానంద్ను ప్రత్యేక దర్యాప్తు బృందం (సిట్) 7 గంటలపాటు విచారించింది. ఓ న్యాయవిద్యార్థినిపై అత్యాచారం చేసినట్లు ఆయనపై ఆరోపణలు ఉన్నాయి.
సుప్రీంకోర్టు ఆదేశాల మేరకు ఏర్పాటైన సిట్ గురువారం రాత్రి చిన్మయానంద్కు సమన్లు జారీ చేసినట్లు ఆయన తరపు న్యాయవాది ఓమ్ సింగ్ తెలిపారు. విచారణ అనంతరం గట్టి బందోబస్తు మధ్య చిన్మయానంద్ నివాసం ముముక్షు ఆశ్రమంలోని దివ్యధామానికి తీసుకువచ్చారని వెల్లడించారు. తరువాత ఆయన పడక గదిని పరిశీలించిన అధికారులు దానికి సీల్ వేశారని పేర్కొన్నారు.
శుక్రవారం కూడా చిన్మయానంద్పై దర్యాప్తు కొనసాగనుందని ఆయన తరపు న్యాయవాది ఓమ్ సింగ్ స్పష్టం చేశారు.
భాజపా సీనియర్ నేత చిన్మయానంద్.. ఏడాదిపాటు తనపై లైంగిక దాడికి పాల్పడినట్లు ఓ న్యాయశాస్త్ర విద్యార్థిని సిట్కు రాసిన లేఖలో ఆరోపించారు. చిన్మయానంద్ అనుచరులు తన హాస్టల్ గది నుంచి కొన్ని ముఖ్య ఆధారాలను తీసుకుపోయారని ఆమె తెలిపారు.
ఎందుకు ఆలస్యం?
చిన్మయానంద్ కేసు వ్యవహారంలో యూపీ ప్రభుత్వం కావాలనే ఆలస్యం చేస్తోందని కాంగ్రెస్ ప్రధాన కార్యదర్శి ప్రియాంక గాంధీ ఆరోపించారు. మహిళ భద్రతకు యోగి ఆదిత్యనాథ్ ప్రభుత్వం కనీస చర్యలు తీసుకోవడంలేదని ఆగ్రహం వ్యక్తం చేశారు. రాష్ట్ర పోలీసులు చిన్మయానంద్ కేసు విషయంలో ఎందుకు అలసత్వం ప్రదర్శిస్తున్నారని ప్రియాంక ట్విట్టర్లో ప్రశ్నించారు. చిన్మయానంద్పై ఇప్పటి వరకు అత్యాచారం కేసు ఎందుకు నమోదు చేయలేదని ఆగ్రహం వ్యక్తం చేశారు.
ఇదీ చూడండి:'పాకిస్థానీలం అనే మేము.. జిహాదీలకు శిక్షణనిచ్చాం'
