చైనాతో సరిహద్దుల్లో ఎనిమిది నెలలుగా ఉద్రిక్తతలు కొనసాగుతున్నాయి. ఈ నేపథ్యంలో ఓ వైపు చర్చలంటూ... మరోవైపు సరిహద్దుల్లో మౌలిక సదుపాయాలను త్వరితగతిన అభివృద్ధి చేస్తోంది పొరుగు దేశం. లద్దాఖ్ నుంచి సిక్కిం వరకు 3,488కిలోమీటర్లు పొడవున రాడార్ వ్యవస్థ అభివృద్ధిని వేగవంతం చేసిందని ఉన్నతాధికారులు వెల్లడించారు.
అధికారులు తెలిపిన ఇతర అంశాలు...
- యెచెంగ్ వద్ద ఓ మధ్యస్థాయి భవనం, వాచ్టవర్ను చైనా నిర్మిస్తోంది. సరిహద్దులో నిఘా వ్యవస్థను బలోపేతం చేసేందుకు రాడార్ల సంఖ్యను మూడు నుంచి నాలుగుకు పెంచింది. ఇప్పటికే జేవై-26, హెచ్జీఆర్-105, జేఎల్సీ-88బీ రాడార్లు ఉండగా... కొత్తగా మరొక రాడార్ను ఏర్పాటు చేసింది.
- సిక్కింకు సమీపంలోని పాలీ, ఫారీ క్యారాంగ్ లా ప్రాంతానికి రెండు కిలోమీటర్లు దూరంలో రాడార్సైట్ను ఏర్పాటు చేసింది. అందులో నాలుగు రాడార్లు ఉన్నాయి.
- సెంట్రల్ భూటాన్కు సమీపంలో యాండార్క్ త్సో వద్ద నిఘా సదుపాయాలను అభివృద్ధి చేసింది.
- త్సోనాకు ఈశాన్యంగా ఆరు కిలోమీటర్ల దూరంలో క్యూనా ఎలక్ట్రానిక్ వార్ఫేర్ స్టేషన్ ఉంది. ఈ సైట్‌లో మూడు రాడోమ్‌లు, మూడు రాడార్లు, ఐదు భవనాలు ఉన్నాయి.
- అరుణాచల్ ప్రదేశ్ సమీపంలో లింజి, నిగిటి వద్ద కూడా రాడార్ వ్యవస్థను ఏర్పాటు చేసింది.
- కారాకోరం కనుమలో వివాదాస్పద ప్రదేశమైన రెచిన్ లా సమీపంలో మౌలిక సదుపాయాలను అభివృద్ధి చేసింది చైనా. మోడల్ గ్రామాలుగా పిలిచే శాశ్వత ఇంటిగ్రేటెడ్ నివాసయోగ్యమైన మౌలిక సదుపాయాలను కూడా నిర్మిస్తోంది. వాస్తవాధీన రేఖ అంతటా ఇటువంటి గ్రామాలు గుర్తించాం.