ప్రత్యేక విమానం అనుమతిలో చైనా జాప్యం

చైనాకు మరో ప్రత్యేక విమానాన్ని పంపేందుకు భారత్​ సిద్ధమైంది. అయితే దీనికి బీజింగ్​ అనుమతి లభించడం లేదు. దీనిపై ప్రశ్నించగా.. గతంలో రెండు విమానాల విషయంలో సహకరించాం కదా అని దాటవేస్తోంది చైనా విదేశాంగ మంత్రిత్వశాఖ.

కరోనా వైరస్​ పుట్టిన చైనాలోని వుహాన్ నగరానికి ఔషధాలు పంపించి, అక్కడ ఉన్న భారతీయులను తీసుకురావడానికి ​మరో విమానాన్ని పంపాలని నిర్ణయించింది భారత్​. అందుకోసం సీ-17 ప్రత్యేక విమానాన్ని ఏర్పాటు చేసింది. అయితే దీనికి చైనా నుంచి అనుమతి లభించడం లేదు. రెండు దేశాల అధికార విభాగాలు చర్చలు జరిపిన తర్వాత షెడ్యూల్​ ఖరారు చేయనున్నారు.

వుహాన్​ ఉన్న మరో 80మందిని భారత్​కు తీసుకొచ్చేందుకు ప్రయత్నాలు చేస్తున్నారు అధికారులు. ఈ నేపథ్యంలో ఔషధాలతో ప్రత్యేక విమానాన్ని చైనాకు పంపి, అక్కడ చిక్కుకున్న భారతీయులతో పాటు ఇతర దేశాల పౌరులను తీసుకొస్తామని ఫిబ్రవరి 17న భారత్​ ప్రకటించింది.​ అయితే.. చైనా అనుమతి కోసం ఎదురుచూస్తోంది భారత్​.

భారత్​కు సహకరించాం..

ఇటీవల రెండు ప్రత్యేక విమానాల ద్వారా 647 మంది భారతీయులను, మాల్దీవులకు చెందిన ఏడుగురిని తీసుకొచ్చింది భారత్​. అయితే మూడో విమానానికి అనుమతి ఇవ్వడానికి ఎందుకు ఆలస్యం అవుతుందని చైనా విదేశాంగ మంత్రిత్వ శాఖ ఉన్నతాధికారిని విలేకరి ​ప్రశ్నంచిగా.. వుహాన్​, హుబేలోని భారతీయులను తరలించడానికి ఇప్పటికే రెండు దఫాలు చైనా సహాయం చేసిందని దాటవేశారు.

ఇదీ చూడండి:వుహాన్​లోని భారతీయుల కోసం మిలిటరీ విమానం