కాంగ్రెస్ ప్రకటించిన న్యూన్తమ్ ఆయీ యోజన(న్యాయ్) నిరుపేదలకు మేలు చేకూర్చే అత్యుత్తమ పథకమని చెప్పారు ఆ పార్టీ సీనియర్ నేత చిదంబరం. ఆర్బీఐ మాజీ గవర్నర్ రఘురామ్ రాజన్ వంటి ఆర్థిక నిపుణులతో చర్చించాకే న్యాయ్ను ప్రకటించామని చెన్నైలో వెల్లడించారు. ఈ పథకం అమలుకు అయ్యే వ్యయం జీడీపీలో 1.8 శాతం మాత్రమేనని తెలిపారు.
దశల వారీ అమలు
న్యాయ్ను దశల వారీగా అమలు చేస్తామని ప్రకటించారు చిదంబరం. ఈ పథకం ద్వారా 5 కోట్ల నిరుపేద కుటుంబాలకు లబ్ధి చేకూరనున్నట్లు వివరించారు. లబ్ధిదారులను ఎంపిక చేసేందుకు తమవద్ద అనేక మార్గాలు, గణాంకాలున్నాయన్నారు. భాజపా వ్యాఖ్యలపై స్పందిస్తూ.. 2009లోనూ మహాత్మాగాంధీ ఉపాధి హామీ పథకాన్ని చట్టం చేసినప్పుడు అరుణ్జైట్లీ వ్యతిరేకించారని గుర్తుచేశారు.
పేదరికాన్ని నిర్మూలించేందుకు ఉద్దేశించిన న్యాయ్ పథకంపై చేసే విమర్శలకు సమాధానమివ్వాల్సిన అవసరం లేదని పేర్కొన్నారు చిదంబరం. న్యాయ్ పథకం అమలులో ఉన్న సాధక బాధకాలు తమకు తెలుసని వాటిని సరైన విధంగా ఎదుర్కొంటామన్నారు.
కిసాన్ సమ్మాన్పై విమర్శలు
రైతులకు పెట్టుబడి సాయానికి ఉద్దేశించిన కిసాన్ సమ్మాన్ నిధి పథకం అమలుపై విమర్శలు చేశారు చిదంబరం. భాజపాకు చిత్తశుద్ధి ఉంటే గత ఐదేళ్లుగా కిసాన్ సమ్మాన్ నిధిని ఎందుకు అమలుచేయలేదని ప్రశ్నించారు.ఏప్రిల్ 2న కాంగ్రెస్ మ్యానిఫెస్టో విడుదలయ్యే అవకాశం ఉందని చిదంబరం తెలిపారు.
న్యాయ్ పథకంపై చిదంబరం స్పందన "న్యాయ్ పథకం పేదరికంపై మెరుపుదాడి. పథకాన్ని పూర్తిస్థాయిలో అమలు చేసినా జీడీపీలో 1.8 శాతమే వ్యయమవుతుంది. న్యాయ్ అమలుపై చాలామంది ఆర్థిక నిపుణులతో సంప్రదించాం. ఈ పథకాన్ని అమలు చేసేందుకు భారత్కు శక్తి సామర్థ్యాలున్నాయని వారు తెలిపారు. పథకాన్ని సరైన విధంగా రూపొందించాల్సి ఉంది. క్షేత్రస్థాయిలో పరీక్షిస్తాం. అనంతరమే అమలు చేస్తాం. నెలకు 6 వేల రూపాయలు చొప్పున ఏటా రూ. 72వేలు ఖాతాలో జమ చేస్తాం. కుటుంబంలోని మహిళ ఖాతాలో ఈ డబ్బును జమచేస్తాం. ప్రతీ కుటుంబంలోని మహిళ పేరుతో బ్యాంకు ఖాతా తెరవాల్సి ఉంటుంది. "
- పి. చిదంబరం, కాంగ్రెస్ సీనియర్ నేత
ఇదీ చూడండి:'నరేంద్ర మోదీ' చిత్ర నిర్మాతలకు నోటీసులు
