16 ఏళ్ల బాలుడికి, 19 ఏళ్ల అమ్మాయికి బలవంతపు పెళ్లి

బెంగళూరులోని అరకేరేలో జరిగిన ఓ బాల్యవివాహం ఆలస్యంగా వెలుగుచూసింది. దగ్గరి బంధువులు 16 ఏళ్ల బాలుడికి, 19 ఏళ్ల అమ్మాయికి బలవంతంగా పెళ్లి చేశారు. ఓ ఎన్​జీఓ ఫిర్యాదులో రంగంలోకి దిగిన పోలీసులు బాలుడ్ని, అమ్మాయిని చట్టం ప్రకారం వేరుచేశారు. బాధ్యులపై కేసులు నమోదుచేశారు.

పదహారేళ్ల బాలుడికి, 19 ఏళ్ల అమ్మాయికి బలవంతంగా పెళ్లి చేసిన ఘటన బెంగళూరులోని మైకో లేఅవుట్​ అరకేరేలో జరిగింది. కర్ణాటకలో వారం రోజుల క్రితం జరిగిన ఈ తంతు.... ఓ ఎన్​జీఓ పోలీసులకు ఫిర్యాదు చేయడం వల్ల వెలుగులోకి వచ్చింది.

స్వచ్ఛంద సంస్థ సభ్యుల సమాచారంతో పుట్టెనహళ్లి పోలీసులు బాలుడి నివాసానికి వెళ్లారు. తల్లిదండ్రులను విచారించి బాల్యవివాహం గురించి తెలుసుకున్నారు. తరువాత చట్టం ప్రకారం ఈ వధూవరులను వేరుపరిచారు.

బాల్యవివాహాల నిషేధ చట్టాన్ని ఉల్లంఘించి ఈ వివాహం జరిపించిన వధూవరుల తల్లిదండ్రులు, బంధువులపై పుట్టెనహళ్లి పోలీసులు కేసు నమోదుచేశారు.

అసోంకు చెందిన ఈ రెండు కుటుంబాల వారు 20 ఏళ్లుగా బెంగళూరులో ఉంటున్నారు. వీరు దగ్గరి బంధువులు కూడా. అమ్మాయికి తల్లిదండ్రులు లేరు. ఆమె ప్రస్తుతం అత్తతో కలిసి ఉంటోంది.

ఇదీ చూడండి:'దేశ ఖ్యాతి పెరుగుతుంటే కాంగ్రెస్​కు బాధ ఎందుకో?'