జైలు నుంచి వచ్చాక చిదంబరం తొలి మీడియా సమావేశం

ఐఎన్​ఎక్స్​ మీడియా కేసులో బెయిల్​పై విడుదలైన కేంద్ర మాజీ మంత్రి పి.చిదంబరం నేడు మీడియా సమావేశం నిర్వహించనున్నారు. 106 రోజుల తర్వాత జైలు నుంచి నిన్న విడుదలయిన చిదంబరం నేడు మీడియాతో మాట్లాడనున్నారు.

ఐఎన్​ఎక్స్ మీడియా కేసులో బెయిల్​పై బయటకు వచ్చిన కేంద్ర మాజీ మంత్రి, కాంగ్రెస్ సీనియర్​ నేత పి.చిదంబరం నేడు మీడియా సమావేశంలో పాల్గొననున్నారు. మనీలాండరింగ్‌ కేసు విచారణలో భాగంగా 106 రోజులుగా కస్టడీలో ఉన్న చిదంబరానికి బెయిల్​ మంజూరు అయి నిన్న విముక్తి లభించింది. తిహార్​ జైలు నుంచి విడుదలైనందుకు సంతోషం వ్యక్తం చేశారాయన. అనంతరం కాంగ్రెస్ అధినేత్రి సోనియా గాంధీతో సమావేశమయ్యారు. చిదంబరానికి పూర్తి మద్దతుగా ఉన్నట్లు సోనియా తెలిపారు.

షరతులతో బెయిల్​..

రూ.2 లక్షల బాండు, ఇద్దరి పూచీకత్తుపై చిదంబరానికి బెయిల్‌ మంజూరు చేసింది సర్వోన్నత న్యాయస్థానం. కోర్టు అనుమతి లేకుండా విదేశాలకు వెళ్లొద్దని, సాక్షులతో సంప్రదింపులు జరపవద్దని ఆంక్షలు విధించింది. కేసుకు సంబంధించిన విషయాలు మీడియాతో మాట్లాడరాదని ఆజ్ఞాపించింది.

ఇదీ కేసు..

చిదంబరం కేంద్ర ఆర్థిక మంత్రిగా ఉన్నప్పుడు.. ఐఎన్​ఎక్స్​ మీడియాకు విదేశీ పెట్టుబడుల ప్రోత్సాహక బోర్డు అనుమతులు మంజూరులో అవకతవకలకు పాల్పడినట్లు 2017 మే 15న సీబీఐ కేసు నమోదు చేసింది. ఈ కేసు ఆధారంగా ఎన్​ఫోర్స్​మెంట్​ డైరెక్టరేట్​ మనీలాండరింగ్ కేసు పెట్టింది. గత ఆగస్టు 21న చిదంబరంను కస్టడీలోకి తీసుకుంది సీబీఐ. అనంతరం అక్టోబర్​ 16న ఈడీ అదుపులోకి తీసుకుంది. ఆ తర్వాత ఆగస్టు 21 నుంచి కస్టడీలో ఉన్నారు చిదంబరం.

ఇదీ చూడండి: నిర్భయ దోషులకు 'తలారి'గా నేనుంటా.. అవకాశమివ్వండి!​