ఛోటా రాజన్​కు 8 ఏళ్ల కఠిన కారాగార శిక్ష

2012 నాటి హత్యాయత్నం కేసులో గ్యాంగ్​స్టర్​ ఛోటారాజన్​కు 8 ఏళ్ల జైలు శిక్ష విధించింది ముంబయి కోర్టు. మరో ఐదుగురికి శిక్ష ఖరారు చేసింది.

హత్యాయత్నం కేసులో ముంబయి గ్యాంగ్​స్టర్​ ఛోటా రాజన్​తో పాటు మరో ఐదుగురికి 8 ఏళ్ల జైలు శిక్ష పడింది. ఓ హోటల్ యజమాని వేసిన ఈ కేసులో ముంబయి ప్రత్యేక కోర్టు ఈ తీర్పునిచ్చింది.

2012 అక్టోబర్​లో స్నేహితుడిని కలవడానికి వెళుతున్న హోటల్​ యజమాని బీఆర్​ శెట్టిని అంధేరీలో కాల్చారు. ఈ కేసును విచారించిన కోర్టు.. మహారాష్ట్ర ఆర్గనైజ్​డ్​ నేరాల నియంత్రణ చట్టం(ఎంకోకా) ప్రకారం తీర్పును వెలువరించింది. జైలు శిక్షతో పాటు దోషులకు ఒక్కొక్కరికి రూ.5 లక్షల జరిమానా విధించింది.

2015లో ఇండోనేసియాలో రాజన్​ను పట్టుకుని భారత్​కు తీసుకొచ్చారు. అప్పటినుంచి దిల్లీలోని తీహార్​ జైలులో ఉంటున్నాడు. రాజన్​తో పాటు దోషులుగా తేలిన నిత్యానంద్​ నాయక్, సెల్విన్​ డేనియల్, రోహిత్​ తంగప్పన్​ జొసెఫ్​(సతీశ్​ కాలియా), దిలిప్​ ఉపాధ్యాయ్, తల్విందర్​ సింగ్​లకు శిక్ష పడింది.

ఇదీ చూడండి: మగాళ్లతో స్నేహం వద్దంటే తండ్రినే చంపేసింది..!