చదరంగం ఆటతో వరద బాధితులకు సాయం

సహజ సౌందర్యంతో అలరారుతూ ఆహ్లాదకరంగా ఉండే కేరళ రాష్ట్రం వరదలతో అతలాకుతలమైంది. ఇటీవలి వర్షాలు, వరదలతో.. ప్రకృతి రమణీయతను కోల్పోయింది. వరద బాధితులకు అండగా నిలిచేందుకు తిరువనంతపురంలోని ఓ పాఠశాల విద్యార్థులు ముందుకొచ్చారు. విభిన్న కార్యక్రమాల ద్వారా.. నిధులు సేకరించారు.

కేరళ వరద బాధితులను ఆదుకునేందుకు ముందుకొచ్చింది తిరువనంతపురంలోని కార్మెల్​ బాలికల ఉన్నత పాఠశాల. వరద బాధితులకు ఎవరికి తోచిన రీతిలో వారు సాయం అందిస్తూనే ఉన్నా.. వీరు ప్రత్యేకంగా నిలిచారు. చదరంగం పోటీలు పెట్టి విరాళాల సేకరణకు శ్రీకారం చుట్టారు.

అంతర్జాతీయ చెస్​ క్రీడాకారిణి, కార్మెల్​ పాఠశాల విద్యార్థిని అనుపమ్​ శ్రీకుమార్ ఒకేసారి 30 మంది విద్యార్థులతో చెస్​ ఆడింది. వరద బాధితుల్ని ఆదుకునేందుకు చదరంగంతో పాటు పలు కార్యక్రమాలు నిర్వహించిందీ పాఠశాల. ​వచ్చిన రిజిస్ట్రేషన్​ ఫీజులను వరద బాధితులకు సాయంగా అందించనున్నారు. మంత్రి జయరాజన్​ ఈ పోటీల్ని ప్రారంభించారు.

కేరళలో ఇటీవల కురిసిన వర్షాల ధాటికి దాదాపు 120 మందికిపైగా ప్రాణాలు కోల్పోయారు. పదుల సంఖ్యలో గల్లంతయ్యారు. వేలాది మంది నిరాశ్రయులయ్యారు.