మరో విక్రమ్​ను రూపొందిస్తున్న ఇస్రో- కారణమిదే!

చంద్రయాన్​-2 ల్యాండర్​ విక్రమ్​ చంద్రునిపై దిగే సమయంలో అనుకోని అవాంతరం ఎదురైంది. దీనికి కారణాలు వెతికే పనిలో పడింది ఇస్రో. డేటా ఆధారంగా పలు సిమ్యులేషన్లు రూపొందిస్తోంది.

చంద్రుని ఉపరితలంపై దిగే క్రమంలో చంద్రయాన్​-2 ల్యాండర్​ 'విక్రమ్'​ ఎదుర్కొన్న సమస్యలను ఇస్రో సమీక్షిస్తోంది. ఇందుకోసం జాబిల్లిపై ల్యాండర్​ సాఫీగా దిగేందుకు తాను వేసిన అంచనాల్లో వైరుధ్యాలను నిగ్గుతేల్చాలని నిర్ణయించింది. భూ కేంద్రంతో సంబంధాలు తెగిపోవడానికి ముందు విక్రమ్ పంపిన డేటాను పరిశీలిస్తోంది.

డేటా ఆధారంగా

విక్రమ్ పంపిన డేటా ఆధారంగా ఊహాజనిత కారణాలను అన్వయించుకుంటూ.. పలు సిమ్యులేషన్లను ఇస్రో రూపొందించనుంది. దీని ద్వారా విక్రమ్​లో తలెత్తిన లోపాలను నిర్దిష్టంగా గుర్తించడానికి ప్రయత్నిస్తోంది. ప్రయోగానికి ముందు నిర్వహించిన ఏదైనా సిమ్యులేషన్​ను.. ఆ తరువాత విస్మరించామా లేక పరీక్షల సమయంలో తలెత్తిన ఏదైనా వైరుధ్యాన్ని పరిగణనలోకి తీసుకోలేదా అన్నది పరిశీలించనుంది.

ఇలాంటివి సాధారణమే

చంద్రయాన్​-2 ప్రయోగం భారతదేశానికి గర్వకారణమని దేశ తొలి వ్యోమగామి రాకేశ్​ శర్మ వ్యాఖ్యానించారు. విక్రమ్​ ల్యాండర్​ సమస్యల గురించి ప్రస్తావిస్తూ.. పరిశోధనల్లో ఇలాంటి పరిణామాలు సాధారణమేమని పేర్కొన్నారు.

ఇదీ చూడండి:5 రాజ్యసభ స్థాయీ సంఘాలకు విపక్షాల నేతృత్వం