నిలిచిన చంద్రయాన్-2- విజయం వాయిదా చంద్రుడిపై మనిషి అడుగుపెట్టి జులై 20కి 50 ఏళ్లు పూర్తవుతున్న వేళ మరోసారి చంద్రమండల యాత్ర చేపట్టిన భారత అంతరిక్ష పరిశోధన సంస్థ- ఇస్రో సాంకేతిక సమస్యతో చంద్రయాన్-2 ప్రయోగాన్ని నిలిపివేసింది. ప్రయోగ సమయానికి సరిగ్గా 56 నిమిషాల 24 సెకన్లు ముందు కౌంట్‌డౌన్‌ నిలిచిపోయింది. ఆ తర్వాత 2, 3 నిమిషాలకే చంద్రయాన్-2 ప్రయోగ ప్రత్యక్ష ప్రసారాన్ని ఆపేశారు.
వాహకనౌకలో సాంకేతిక సమస్య కారణంగా ప్రయోగం నిలిపివేస్తున్నట్లు ఇస్రో ప్రకటించింది. మళ్లీ ఆ ప్రయోగాన్ని ఎప్పుడు చేపట్టేది తర్వాత ప్రకటిస్తామని ఇస్రో అధికారులు చెప్పారు.
"ప్రయోగానికి 56 నిమిషాల ముందు...వాహకనౌక వ్యవస్థలో సాంకేతికపరమైన సమస్య గుర్తించాం. ముందుజాగ్రత్త చర్యగా చంద్రయాన్2 ప్రయోగాన్ని ఇవాళ నిలిపివేశాం.
తదుపరి ప్రయోగ తేదీని తర్వాత ప్రకటిస్తాం". - బి.ఆర్‌.గురుప్రసాద్‌, ఇస్రో అసోసియేట్‌ డైరెక్టర్‌
మళ్లీ ఎప్పుడు..?
అన్నీ అనుకున్నట్లు సాగి ఉంటే ఈ తెల్లవారుజామున 2 గంటల 51 నిమిషాలకు శ్రీహరికోట-షార్‌నుంచి జీఎస్ఎల్వీ మార్క్‌3 ఎమ్1 వాహక నౌక నింగిలోకి దూసుకెళ్లి ఉండేది. ఆపై కేవలం 16 నిమిషాల 13 సెకన్ల వ్యవధిలోనే చంద్రయాన్-2 నిర్ణిత కక్ష్యలో ప్రవేశపెట్టి ఉండేది.
సాంకేతికపరమైన సమస్య కారణంగా ప్రయోగం నిలిచిపోగా., తిరిగి ఈ ప్రయోగాన్ని ఎప్పుడు చేపడతారన్నది ఆసక్తికరంగా మారింది. గతంలో ఈ ప్రయోగాన్ని జనవరి మొదటివారంలోనే చేపట్టాలని నిర్ణయించినప్పటికీ జులై 15కు వాయిదా పడింది. సాధారణంగా నిర్దిష్ట సమయంలోనే వ్యోమనౌకను ప్రయోగించాల్సి ఉంటుంది. ఒకవేళ ఆ సమయంలో ప్రయోగించలేకపోతే మళ్లీ అనువైన సమయం వచ్చే వరకూ ఎదురు చూడాల్సిందే.
ప్రస్తుత లాంచ్ విండోతో ప్రయోగాన్ని పూర్తి చేసేందుకు.. ఇస్రో తీవ్రంగా శ్రమించినప్పటికీ నిరాశే ఎదురైంది. మళ్లీ ఈ ప్రయోగాన్ని చేపట్టేందుకు అనువుగా ఈ నెలలో కేవలం 1 నిమిషం నిడివి ఉన్న లాంచ్ విండోలే అందుబాటులో ఉన్నాయి. ఇవాల్టి లాంచ్ విండో నిడివి 10 నిమిషాలు కావటం గమనార్హాం.
రాష్ట్రపతి తిరుగు ప్రయాణం...
చంద్రయాన్-2 ప్రయోగాన్ని స్వయంగా వీక్షించేందుకు రాష్ట్రపతి రామ్‌నాథ్‌ కోవింద్‌ గత రాత్రే సతీష్‌ ధావన్‌ అంతరిక్ష ప్రయోగ కేంద్రానికి చేరుకున్నారు. ప్రయోగం నిలిచిపోవడం వల్ల ఆయన ఈ ఉదయం తిరిగి దిల్లీ వెళ్లనున్నారు.
