చంద్రయాన్-2: ఏడాదిలో జాబిల్లి చుట్టూ 4,400 ప్రదక్షిణలు

చంద్రునిపై పరిశోధన కోసం భారత్ ప్రతిష్ఠాత్మకంగా ప్రయోగించిన చంద్రయాన్​-2.. జాబిల్లి కక్ష్యలోకి చేరి గురువారానికి ఏడాది పూర్తయింది. ఈ సందర్భంగా ఆర్బిటార్ సక్రమంగానే పనిచేస్తోందని ఇస్రో తెలిపింది. ఇప్పటివరకు చంద్రుని చుట్టూ 4,400 సార్లు ప్రదక్షిణలు చేసినట్లు వెల్లడించింది.

భారత్​ ప్రతిష్ఠాత్మకంగా ప్రయోగించిన చంద్రయాన్ -2.. చంద్రుని కక్ష్యలో చేరి ఏడాది పూర్తయింది. ఈ సందర్భంగా చంద్రయాన్​- 2లో అన్ని యంత్రాలు సక్రమంగా పనిచేస్తున్నట్లు భారత అంతరిక్ష సంస్థ ఇస్రో తెలిపింది. మరో ఏడేళ్లు నిర్విరామంగా పనిచేసేందుకు ఆర్బిటార్​లో తగినంత ఆన్​బోర్డ్ ఇంధనం ఉందని స్పష్టం చేసింది.

గతేడాది జులై 22న చంద్రయాన్​-2 ను ఇస్రో ప్రయోగించగా ఆగస్టు 20న చంద్రుని కక్ష్యలో చేరింది. చంద్రునిపై రోవర్​ను దింపేందుకు భారత్ చేసిన తొలి ప్రయోగం ఇదే. అయితే చంద్రుని ఉపరితలంపై విక్రమ్ (ల్యాండర్​)​ సాఫ్ట్ ల్యాండింగ్ విఫలమైనా ఆర్బిటార్​ మాత్రం జాబిల్లి కక్ష్యలో విజయవంతంగా పనిచేస్తోంది. ఇప్పటివరకు మొత్తం 4,400 సార్లు చంద్రుని చుట్టూ తిరిగింది.

డేటా సేకరణ..

చంద్రుని ఉపరితలంపై పరిశోధన, ఖనిజాలు, నీటి జాడ కోసం చంద్రయాన్​- 2ను ప్రయోగించింది ఇస్రో. ఇందుకోసం రోవర్​తో పాటు ఆర్బిటార్​లో 8 పేలోడ్​లు, కెమెరాలను అమర్చింది.

ఇప్పటివరకు ఆర్బిటార్​ పంపిస్తోన్న డేటాను భారత అంతరిక్ష శాస్త్రీయ సమాచార కేంద్రం (ఐఎస్​ఎస్​డీసీ)లో నిక్షిప్తం చేస్తున్నట్లు ఇస్రో తెలిపింది. ఆర్బిటార్​ పంపిన సమాచారాన్ని ఈ ఏడాది చివరికల్లా విడుదల చేసేందుకు సన్నాహాలు చేస్తున్నట్లు ఇస్రో స్పష్టం చేసింది.

ఇదీ చూడండి:చంద్రయాన్-2: '500మీ. దూరంలో అలా జరిగిపోయింది'