కశ్మీర్​: రాజకీయ పార్టీలు, వేర్పాటువాదుల దారెటు?

జమ్ముకశ్మీర్​ స్వయం ప్రతిపత్తి హోదాను రద్దు చేసి రెండు కేంద్ర పాలిత ప్రాంతాలుగా విభజిస్తూ కేంద్రం తీసుకున్న నిర్ణయంతో... ఆ రాష్ట్రంలో ప్రధాన రాజకీయ పార్టీలు, వేర్పాటువాదులు దగ్గరయ్యే పరిస్థితి ఏర్పడిందని స్థానికులు చెబుతున్నారు. ఈ విషయంలో సుప్రీంకోర్టు జోక్యం చేసుకుని తమ హక్కులను తిరిగిస్తుందని ఆశాభావం వ్యక్తం చేస్తున్నారు.

జమ్ముకశ్మీర్​లో ప్రత్యేకించి శ్రీనగర్​లో​ స్థానికులు.. కేంద్రం ఆర్టికల్​ 370ని రద్దు చేయడాన్ని తీవ్రంగా వ్యతిరేకిస్తున్నారు. కశ్మీర్​ను రెండు కేంద్ర పాలిత ప్రాంతాలుగా విభజించి దేశంలోనే అధిక సంఖ్యలో ముస్లింలు గల రాష్ట్రంలో తమ ప్రత్యేక హక్కులను హరించివేశారని చెబుతున్నారు.

కేంద్రం నిర్ణయంతో కశ్మీర్​లోని ప్రధాన రాజకీయ పార్టీలు, వేర్పాటువాదులకు మధ్య గీతను చెరిపేసే పరిస్థితి ఏర్పడిందంటున్నారు స్థానికులు. అన్ని రాజకీయపార్టీలు ఏకమై కేంద్రం నిర్ణయాన్ని వెనక్కి తీసుకునేలా పోరాటం చేయాలని కోరుతున్నారు.

"ఇది పీపుల్స్​ డెమొక్రటిక్​ పార్టీ, నేషనల్​ కాన్ఫరెన్స్​, హురియత్​ పార్టీలకు సంబంధించిన అంశం కాదు. కశ్మీరీలు, మెజారిటీ ముస్లింలకు సంబంధించిన విషయం. కశ్మీర్​ లోయలో అధిక జనాభా గల వారిపై ప్రభావం చూపే విధంగా భాజపా తీసుకుంటున్న నిర్ణయాలను అడ్డుకోవాలి."
-ఐజాజ్​ భట్​, స్థానిక వ్యాపారి

కశ్మీర్​లో ఆర్టికల్ 370 రద్దు, రాష్ట్రాన్ని రెండు కేంద్రపాలిత ప్రాంతాలుగా విభజిస్తూ కేంద్రం తీసుకున్న నిర్ణయం వెన్నుపోటు, ద్రోహంతో సమానమని అభిప్రాయపడ్డారు భట్​. జమ్ముకశ్మీర్​ ప్రత్యేక హోదాకు ఎలాంటి ముప్పు లేదని కేంద్ర ప్రభుత్వం నియమించిన గవర్నర్​ పదే పదే ప్రజలకు చెప్పేవారని తెలిపారు.

కశ్మీర్​లో ఆర్టికల్​ 370 రద్దు చేసిన తర్వాత పీడీపీ అధినేత్రి మెహబూబా ముఫ్తీ, ఎన్​సీపీ నేత ఒమర్ అబ్దుల్లాలను అరెస్టు చేశారు. వీరితో పాటు మరికొంత మంది రాజకీయ నాయకులను ముందు జాగ్రత్త చర్యగా అదుపులోకి తీసుకున్నారు అధికారులు.

సుప్రీంపైనే ఆశలు

జమ్ముకశ్మీర్​ స్వయంప్రతిపత్తి విషయంలో సుప్రీంకోర్టు జోక్యం చేసుకుని తమ హక్కులను తిరిగి తెస్తుందని స్థానికులు ఆశాభావం వ్యక్తం చేస్తున్నారు. కేంద్ర నిర్ణయంపై కశ్మీర్​లోని సిక్కులూ అసంతృప్తి వ్యక్తం చేస్తున్నారు. ఈ చర్య రాజకీయ పార్టీలు, వేర్పాటువాదులను ఏకం చేసే విధంగా ఉందని అభిప్రాయం వ్యక్తం చేస్తున్నారు.

"ఇక భారత్​ మద్దతుదారులకు, వేర్పాటువాదులకు మధ్య భేదాభిప్రాయాలు ఉండవు. కశ్మీర్ ప్రత్యేక హక్కుల కోసం వారు ఐక్యమవుతారు."
-మొహిందర్ సింగ్​, స్థానికుడు.

కేంద్రం నిర్ణయంతో స్థానికేతరులకు కశ్మీర్లో ఉపాధి లభించే అవకాశాలు లేవని వలసదారులు చెబుతున్నారు. ఇప్పట్లో అక్కడ సాధారణ పరిస్థితులు తలెత్తుతాయనే నమ్మకం లేదని బిహార్​ నుంచి వలస వచ్చిన ఓ కార్మికుడు చెప్పాడు.