ఇకపై ల్యాండ్​లైన్​ ఫోన్లలోనూ ఆరోగ్య సేతు యాప్​!

కరోనా బాధితులను గుర్తించడం కోసం తీసుకువచ్చిన ఆరోగ్యసేతు యాప్​ను స్మార్ట్​ఫోన్​కే పరిమితం కాకుండా ల్యాండ్​లైన్​, ఇతర సాధారణ ఫీచర్​ ఫోన్లకు కూడా అనుసంధానం చేయనుంది కేంద్రం. ఇందు కోసం ఆరోగ్య సేతు ఇంటరాక్టివ్​ వాయిస్​ రెస్పాస్స్​ సిస్టమ్​ (ఐవీఆర్​ఎస్​)ను అందుబాటులోకి తీసుకువచ్చింది.

ల్యాండ్‌లైన్‌ ఫోన్లు, సాదారణ ఫీచర్ ఫో‌న్లను ఆరోగ్యసేతు మొబైల్ యాప్‌తో అనుసంధాం చేయడమే లక్ష్యంగా కేంద్రం.. ఆరోగ్య సేతు ఇంటరాక్టివ్ వాయిస్ రెస్పాన్స్ సిస్టమ్‌- ఐవీఆర్​ఎస్​ను తీసుకొచ్చింది. కరోనా కట్టడిలో భాగంగా ప్రతి ఒక్కరూ తప్పనిసరిగా ఆరోగ్య సేతు యాప్‌ను డౌన్‌లోడ్ చేసుకోవాలని కేంద్ర ఆరోగ్య శాఖ ఇప్పటికే తెలిపింది. ఆరోగ్య సేతు ఐవీఆర్​ఎస్​ అన్నది దేశవ్యాప్తంగా అందుబాటులో ఉండే టోల్‌ఫ్రీ నెంబర్ అని‌ పేర్కొన్న కేంద్రం.. ప్రజలు ఆ టోల్‌ఫ్రీ నెంబర్ 1921కి మిస్స్‌డ్‌ కాల్ ఇవ్వాలని తెలిపింది.

వెంటనే వారి ఫోన్‌కి కాల్‌ వస్తుందని.. సదరు పౌరుడి ఆరోగ్య పరిస్థితి గురించి తెలుసుకోవడానికి కొన్ని ప్రశ్నలు వినిపిస్తాయని తెలిపింది. ఆ ప్రశ్నలకు వచ్చిన సమాధానాల మేరకు వారి ఆరోగ్య పరిస్థితికి సంబంధించి ఫోన్‌కు సంక్షిప్త సందేశం రూపంలో నివేదిక వస్తుంది. టోల్‌ఫ్రీ సేవలు 11 ప్రాంతీయ భాషల్లో అందుబాటులో ఉంటాయి.