ఇకపై మూడు విభాగాలుగా కరోనా ఆసుపత్రులు

కరోనా వైరస్​ వ్యాప్తి నేపథ్యంలో అన్ని రాష్ట్రాలకు కేంద్ర ఆరోగ్యశాఖ నూతన మార్గదర్శకాలు జారీ చేసింది. కరోనా అసుపత్రులను మూడు విభాగాలుగా వర్గీకరించాలని స్పష్టం చేసింది. ఇవి కొవిడ్‌ సంరక్షణ కేంద్రం, కొవిడ్‌ ఆరోగ్య కేంద్రం, కొవిడ్‌ ఆసుపత్రిగా ఉండాలని సూచించింది.

కరోనా ఆసుపత్రులను మూడు విభాగాలుగా వర్గీకరించాలని కేంద్ర వైద్య ఆరోగ్య శాఖ నిర్దేశించింది. ఈ మేరకు అన్ని రాష్ట్రాలకూ మార్గదర్శకాలు జారీచేసింది. కొవిడ్‌ సంరక్షణ కేంద్రం, కొవిడ్‌ ఆరోగ్య కేంద్రం, కొవిడ్‌ ఆసుపత్రి పేరుతో వీటిని వర్గీకరించాలని సూచించింది. రోగ తీవ్రత తక్కువ, మధ్యస్థాయి, ఎక్కువస్థాయిలో ఉన్న రోగులను వీటి మధ్య విభజించాలని స్పష్టంచేసింది.

• సంరక్షణ కేంద్రం

తక్కువ (మైల్డ్‌), అతి తక్కువ (వెరీ మైల్డ్‌), అనుమానిత కేసులను ఇక్కడ పెట్టాలి. ఇది తాత్కాలికం కావచ్చు. వసతిగృహాలు, హోటళ్లు, పాఠశాలలు, స్టేడియంలు, లాడ్జ్‌లు, ధర్మశాలల్లో వీటిని ఏర్పాటు చేసుకోవచ్చు. క్వారంటైన్‌ కేంద్రాలను కొవిడ్‌ సంరక్షణ కేంద్రాలుగానూ మార్చుకోవచ్చు. ఈ కేంద్రాన్ని ఆసుపత్రి, ఆరోగ్య కేంద్రంతో మ్యాపింగ్‌ చేయాలి. ఇక్కడున్న రోగులకు తదుపరి వైద్యసేవలు అవసరమైతే అందుకు అవసరమైన ప్రణాళిక తయారుచేసి సిద్ధంగా ఉంచుకోవాలి.

• ఆరోగ్య కేంద్రం

ఇందులో రోగ తీవ్రత కొంత ఎక్కువ (మోడరేట్‌) ఉన్న వారిని ఉంచాలి. పూర్తి ఆసుపత్రిని లేదా ఆసుపత్రిలో కొంత భాగాన్ని ఇందుకోసం కేటాయించాలి. ఆక్సిజన్‌తో కూడిన పడకలు ఉండాలి.

• ఆసుపత్రులు

లక్షణాల తీవ్రత, ప్రమాదం ఎక్కువగా ఉన్న రోగులకు ఇక్కడ చికిత్స అందించాలి. ఆసుపత్రులు లేదంటే బ్లాక్‌లను ఇందుకు కేటాయించాలి. వీటిలో ఐసీయూ సౌకర్యం, వెంటిలేటర్లు ఉండాలి.

ఇదీ చూడండి:-కరోనా కట్టడికి కేజ్రీవాల్‌ పాంచజన్యం