మూడు కిలోమీటర్లకు.. ఓ వాహన ఛార్జింగ్ స్టేషన్​

విద్యుత్​ వాహనాల వినియోగం పెంపు కోసం సరికొత్త మార్గదర్శకాలను ప్రకటించింది కేంద్రం. జాతీయ, ప్రధాన రహదారులపై ప్రతి 3 కిలోమీటర్లకు ఓ ఛార్జింగ్​ కేంద్రం ఉండేలా చర్యలు తీసుకోనుంది. ఇందుకు తగినట్లు విద్యుత్ పంపిణీ సంస్థలు ఏర్పాట్లు చేసుకోవాలని సూచించింది.

దేశంలో విద్యుత్​ వాహనాల వినియోగం పెంపు దిశగా కేంద్ర ప్రభుత్వం చర్యలను ప్రకటించింది. వాటి ఛార్జింగ్​కు సరికొత్త మార్గదర్శకాలను విడుదల చేసింది.

కేంద్రం మార్గదర్శకాలు

• నగరాల్లో ప్రతి 3 కిలోమీటర్ల పరిధిలో కనీసం ఒక ఛార్జింగ్ స్టేషన్​ అయినా ఉండాలి.
• జాతీయ రహదారులు, ప్రధాన రహదారులకు ఇరువైపులా ప్రతి 25 కిలోమీటర్లకూ ఒక స్టేషన్​ ఏర్పాటు చేయాలి.
• పబ్లిక్​ ఛార్జింగ్ స్టేషన్లకు లైసెన్సులు అవసరం లేదు.
• ఇల్లు, కార్యాలయాల్లో ప్రైవేటు ఛార్జింగ్ స్టేషన్లు ఏర్పాటు చేసుకోవచ్చు.
• ఇళ్లలో పెట్టుకొనే ఛార్జింగ్​కు గృహావసరాలకు అనుగుణంగానే విద్యుత్తు ఛార్జీలు వసూలు చేస్తారు.
• పబ్లిక్​ ఛార్జింగ్​ స్టేషన్లలో మాత్రం 2003 విద్యుత్ చట్టం మేరకు విద్యుత్ నియంత్రణ కమిషన్​ నిర్ధరించే టారిఫ్​ ప్రకారమే వసూలు చేస్తారు.
• విద్యుత్తు పంపిణీ సంస్థలు అందుకు తగిన ఏర్పాట్లు చేయాలి.

మహా నగరాలన్నింటిలో..

వచ్చే మూడేళ్లలో 40 లక్షల జనాభా దాటిన అన్ని మహా నగరాలను కలిపే జాతీయ, కీలక రహదారులన్నింటిపైనా ఈ సదుపాయం కల్పించాలని కేంద్రం తెలిపింది. 3-5 ఏళ్లలో అన్ని రాష్ట్రాలు, కేంద్రపాలిత ప్రాంతాల రాజధానుల్లో ఛార్జింగ్​ నెట్​వర్కులు ఏర్పాటు చేయాలని వెల్లడించింది.

ఇదీ చూడండి: హరియాణా పోరు: ఖట్టర్‌, హుడాల ప్రతిష్ఠకు సవాల్‌!