జలశక్తి: స్థానిక సంస్థలకు కేంద్రం మార్గదర్శకాలు

వర్షపు నీటిని రక్షించేందుకు నగర,పురపాలికలకు కేంద్రం ప్రత్యేక మార్గదర్శకాలను జారీ చేసింది. 'వర్షపు నీటి సంరక్షణ' విభాగాన్ని ప్రారంభించాలని కేంద్ర హౌజింగ్, పట్టణ వ్యవహారాల మంత్రిత్వ శాఖ సూచనలు చేసింది.

పట్టణాలు, నగరాల్లో నీటి సంరక్షణకు కేంద్రం నడుం బిగించింది. వర్షపు నీటి సంరక్షణపై దృష్టి పెట్టింది. ఈ మేరకు నగర, పుర పాలికలకు ప్రత్యేక మార్గదర్శకాలు జారీ చేసింది. ప్రతి స్థానిక సంస్థ పరిధిలో 'వర్షపు నీటి సంరక్షణ' విభాగాన్ని ప్రారంభించాలని కేంద్ర హౌజింగ్, పట్టణ వ్యవహారాల మంత్రిత్వ శాఖ ఆదేశించింది. భూగర్భ జలాల స్థాయి పైనా ఈ విభాగం దృష్టి పెట్టాల్సిఉంటుంది.

జులై 1న జల్​శక్తి అభియాన్​ మొదటి దశలో భాగంగా నీటి సంరక్షణపై కేంద్రం ప్రత్యేక శ్రద్ధ వహిస్తోంది. కేంద్రం సూచించిన అంశాలు...

• భూగర్భ జలాల స్థాయిని ఎప్పటికప్పుడు పర్యవేక్షించాలి.
• ఆ సమాచారాన్ని రద్దీ ప్రదేశాల్లో ప్రదర్శించాలి.
• వర్షపు నీటి హార్వెస్టింగ్​కు ఇంకుడు గుంతలు ఉంటేనే భవన నిర్మాణాలకు అనుమతులు ఇవ్వాలి.
• మొదటి దశలో భాగంగా ప్రతి నగరం, పట్టణంలో కనీసంగా ఏదో ఒక నీటి వనరును కాపాడేలా చర్యలు తీసుకోవాలి.
• సహజ జలాశయాలపై నిర్మాణాలు వరదలకు కారణమవుతాయి. వీటిని తొలగించాలి.
• నీటి వనరుల సమీపంలో మొక్కల పెంపకం చేపట్టాలి.

దేశంలో 255 జిల్లాలు, 1,597 పట్టణాలు, 756 పాలికల్లో నీటి సమస్య ఉందని జల్​శక్తి మంత్రిత్వ శాఖ తెలిపింది.

ఇదీ చూడండి: నమో 2.0: నవ భారత నిర్మాణానికి 'జల్​శక్తి'