కరోనా కట్టడికి 50 జిల్లాలకు కేంద్ర బృందాలు

కరోనాను కట్టడి చేసేందుకు ప్రభుత్వాల మధ్య సమన్వయం కోసం కేంద్ర ఆరోగ్య, కుటుంబ సంక్షేమ శాఖ ఉన్నత స్థాయి బృందాలను ఏర్పాటు చేసింది. కేసుల తీవ్రత ఎక్కువగా ఉన్న 50 జిల్లాలు, మునిసిపాలిటీలను ఈ బృందాలకు కేటాయించింది. క్షేత్రస్థాయిలో పర్యటిస్తూ రాష్ట్ర ప్రభుత్వాలకు సాంకేతిక సహకారం అందించడం కోసం ఈ ఏర్పాట్లు చేసింది కేంద్రం.

దేశంలో కరోనా తీవ్రంగా ఉన్న 50కిపైగా జిల్లాలు, మునిసిపాలిటీల్లో ఉన్నతస్థాయి కేంద్ర బృందాలను నియమించింది ఆరోగ్య, కుటుంబ సంక్షేమ శాఖ. ఈ మొత్తం జిల్లాలు 15 రాష్ట్రాల పరిధిలోనే ఉన్నట్లు తెలిపింది కేంద్రం. కరోనా వైరస్​ నియంత్రణ చర్యల్లో భాగంగా రాష్ట్రాలకు సాంకేతిక సహకారం కోసం ఈ ఏర్పాటు చేసింది.

రాష్ట్రం	జిల్లా/ మునిసిపాలిటీలు
మహారాష్ట్ర	7
తెలంగాణ	4
తమిళనాడు	7
రాజస్థాన్	5
అసోం	6
హరియాణా	4
గుజరాత్	3
కర్ణాటక	4
ఉత్తరాఖండ్	3
మధ్యప్రదేశ్	5
బంగాల్	3
దిల్లీ	3
బీహార్	4
ఉత్తర ప్రదేశ్	4
ఒడిశా	5

ఒక్కో బృందంలో ఇద్దరు ఆరోగ్య నిపుణులు ఉంటారు. పరిపాలన సౌలభ్యం కోసం బృందానికి ఒక సంయుక్త కార్యదర్శి స్థాయి నోడల్​ అధికారిని నియమించారు. ఈ బృంద సభ్యులు క్షేత్రస్థాయిలో పర్యటించి ఆరోగ్య సంరక్షణ సదుపాయాలను సందర్శిస్తారు. వారు సేకరించిన వివరాల ఆధారంగా తీసుకోవాల్సిన చర్యలపై రాష్ట్ర ప్రభుత్వాలకు సూచనలు చేస్తారు.

సమన్వయం కోసం..

కేంద్ర, రాష్ట్ర ప్రభుత్వాల మధ్య సమన్వయం కోసం ఈ ఏర్పాటు చేసింది ప్రభుత్వం. ఫలితంగా కేసుల ప్రభావం తీవ్రంగా ఉన్న జిల్లాలు లేదా మునిసిపాలిటీలు కేంద్రంతో నిరంతరం సంప్రదింపులు జరిపేందుకు వీలుంటుంది.

కరోనా నియంత్రణలో ఎదురయ్యే సవాళ్లను అధిగమించేలా రాష్ట్రాలకు ఈ బృందాలు సహాయం చేస్తాయి. కేసుల పెరుగుదల, వైద్య సదుపాయాలు, మరణాలు రేటు తదితర అంశాలను పరిశీలిస్తూ ఎప్పటికప్పుడు తీసుకోవాల్సిన చర్యలపై రాష్ట్రాలకు సూచనలు చేస్తాయి.

ఇదీ చూడండి:ఇదే మొదటిసారి?...ఒకే ఇంట్లో 26 మందికి కరోనా