సీఆర్పీఎఫ్, బీఎస్ఎఫ్ వంటి కేంద్ర సాయుధ దళాలు(సీఏపీఎఫ్) క్యాంటీన్లలో జూన్ 1 నుంచి కేవలం స్వదేశీ ఉత్పత్తులనే విక్రయించనున్నట్లు ప్రకటించారు కేంద్ర హోంశాఖ మంత్రి అమిత్ షా. సుమారు 50 లక్షల మంది సైనికుల కుటుంబ సభ్యులు స్వదేశీ ఉత్పత్తులే వినియోగిస్తారని తెలిపారు.
ఆర్థిక స్వావలంబన సాధనే లక్ష్యంగా స్వదేశీ ఉత్పత్తులనే వినియోగించాలని ప్రధానమంత్రి నరేంద్ర మోదీ చేసిన విజ్ఞప్తి మేరకు ఈ నిర్ణయం తీసుకున్నట్లు ట్వీట్ చేశారు షా. సాధ్యమైనంత వరకు దేశీయ ఉత్పత్తులను వినియోగించేందుకే ప్రయత్నించాలని, ఇతరులను ఆ దిశగా ప్రోత్సహించాలని ప్రజలను కోరారు.
" సీఏపీఎఫ్ క్యాంటీన్లలో స్వదేశీ ఉత్పత్తులనే విక్రయించాలని హోంశాఖ నిర్ణయించింది. ఈ నిర్ణయం దేశవ్యాప్తంగా ఉన్న సీఏపీఎఫ్ క్యాంటీన్లలో 2020, జూన్ 1 నుంచి అమలులోకి వస్తుంది. దీంతో 10 లక్షల మంది సిబ్బంది కుటుంబాలు దేశీయ ఉత్పత్తులనే వినియోగిస్తారు. ప్రతి భారతీయుడు దేశంలో తయారైన ఉత్పత్తులనే ఉపయోగిస్తే.. ఐదేళ్లలో దేశం స్వయం సమృద్ధి సాధిస్తుంది."
–అమిత్ షా, కేంద్ర హోంమంత్రి.
కేంద్ర సాయుధ దళాలైన సీఆర్పీఎఫ్, బీఎస్ఎఫ్, సీఐఎస్ఎఫ్, ఐటీబీపీ, ఎస్ఎస్బీ, ఎన్ఎస్జీ, అసోం రైఫిల్స్ క్యాంటీన్లు అన్ని కలిసి ఏడాదికి రూ. 2,800 కోట్ల విలువైన వివిధ ఉత్పత్తులను విక్రయిస్తున్నాయి.
