'స్టార్స్'​ పథకానికి కేంద్ర కేబినెట్​ ఆమోదం

నూతన విద్యా విధానంలో భాగంగా.. 'స్టార్స్​' పథకానికి కేంద్ర కేబినెట్​ ఆమోద ముద్ర వేసింది. పాఠశాల విద్యావ్యవస్థను బలోపేతం చేసేందుకు రాష్ట్రాలకు ఈ స్కీమ్​ తోడ్పడుతుందని కేంద్రమంత్రి ప్రకాశ్​ జావడేకర్​ వెల్లడించారు. ఈ పథకం అమలుకు ప్రపంచబ్యాంకు నుంచి ఆర్థిక సహాయాన్ని తీసుకోనుంది కేంద్ర ప్రభుత్వం.

పాఠశాల విద్యావ్యవస్థను బలోపేతం చేసి రాష్ట్రాలకు తోడ్పాటును అందించేందుకు కేంద్రం మరో ముందడుగు వేసింది. జాతీయ విద్యా విధానం (ఎన్​ఈపీ)లో భాగంగా స్ట్రెన్త్​నింగ్​‌ టీచింగ్‌ లెర్నింగ్‌ అండ్‌ రిజల్ట్స్‌ ఫర్‌ స్టేట్స్‌ (స్టార్స్‌) పథకానికి కేంద్ర మంత్రివర్గం ఆమోదం తెలిపింది. ఎన్​ఈపీ అమలుకు కేంద్రం ఓకే చెప్పిందని కేంద్ర మంత్రి ప్రకాష్ జావడేకర్ స్పష్టం చేశారు.

ప్రధాని నరేంద్ర మోదీ అధ్యక్షతన సమావేశమైన కేంద్ర మంత్రివర్గం.. స్టార్స్‌ పథకానికి ప్రపంచబ్యాంకు నుంచి 500 మిలియన్​ డాలర్ల ఆర్థిక సహాయం తీసుకోవాలని నిర్ణయించింది. ఈ స్కీమ్​కు రూ.5వేల 718 కోట్లు వెచ్చించేందుకు కేంద్రం అంగీకరించింది.

జమ్ముకశ్మీర్‌, లద్దాఖ్ కేంద్ర పాలిత ప్రాంతాలకు ప్రత్యేక ప్యాకేజీ ఇచ్చేందుకు ఆమోదం తెలిపింది కేంద్ర మంత్రివర్గం. దీన్‌దయాల్ అంత్యోదయ యోజన కింద రూ. 520 కోట్ల ప్రత్యేక ప్యాకేజీని ఇవ్వనుంది.

ఇదీ చూడండి:-భారత నూతన విద్యా విధానంపై 10 దేశాల ఆసక్తి!