దుమారం రేపుతోన్న యడియూరప్ప ఆడియో క్లిప్!​​

కర్ణాటకలో కాంగ్రెస్​, జేడీఎస్​ సర్కారు కూలిన సమయంలో యడియూరప్ప భాజపా నేతలతో మాట్లాడిన ఆడియో క్లిప్​ ప్రస్తుతం వైరల్​ అవుతోంది. అప్పుడు ముంబయి హోటల్​లో ఉన్న తిరుగుబాటు ఎమ్మెల్యేల విషయం పార్టీ అధ్యక్షుడు అమిత్​ షాకు తెలుసని, వారే పూర్తిగా చూసుకుంటారని ఆడియో క్లిప్​లో యడియూరప్ప అన్నారు. ప్రస్తుతం ఈ వ్యవహారం రాజకీయ దుమారం రేపుతోంది.

కర్ణాటకలో కుమారస్వామి ప్రభుత్వం గద్దె దిగటానికి కారణమైన 17 మంది ఎమ్మెల్యేల తిరుగుబాటు వ్యవహారం పార్టీ అధ్యక్షుడు అమిత్​షాకు తెలుసంటూ భాజపా కార్యకర్తలతో ముఖ్యమంత్రి యడియూరప్ప మాట్లాడిన ఆడియో క్లిప్​ వైరల్​ అవుతోంది. ఈ వ్యవహారం ప్రస్తుతం కర్ణాటకలో రాజకీయ అలజడి సృష్టిస్తోంది.

17 మంది ఎమ్మెల్యేలు పార్టీ విప్​ను ధిక్కరించి సభలో బలపరీక్షకు హాజరుకాకుండా ముంబయిలోని 5 నక్షత్రాల హోటల్​లో బస చేయటానికి అన్ని ఏర్పాట్లు కూడా అమిత్​ షానే చేశారని.. అన్ని విషయాలు ఆయనకే తెలుసని ఆడియో టేప్​లో ఉంది.

ఈ ఆడియో విషయపై యడియూరప్పను ప్రశ్నించగా.. హుబ్లీ నియోజకవర్గం గురించే తాను మాట్లాడానని, బాధ్యత గల కార్యకర్తలెవ్వరూ అలా మాట్లాడకూడదని చెప్పానని అన్నారు.

కోర్టును ఆశ్రయిస్తాం..

ముఖ్యమంత్రి మాట్లాడిన ఆడియో ద్వారా భాజపా వైఖరి బయటపడిందని విమర్శించారు జేడీఎస్​ నేత, కర్ణాటక మాజీ ముఖ్యమంత్రి కుమారస్వామి. ఆడియో ఆధారంగా కోర్టులో కేసు వేస్తామని తెలిపారు. ఆడియోలో ఉన్న సమాచారాన్ని కోర్టుకు అందిస్తామని చెప్పారు.

గవర్నర్​కు ఫిర్యాదు..

ముఖ్యమంత్రి ఆడియో టేప్​పై గవర్నర్​కు ఫిర్యాదు చేసినట్లు తెలిపారు కాంగ్రెస్​ సీనియర్​ నేత సిద్ధరామయ్య. కర్ణాటక ప్రభుత్వాన్ని రద్దు చేయాలని కోరినట్లు చెప్పారు. ఈ విషయంపై రాష్ట్రపతికి ఫిర్యాదు చేయనున్నట్లు పేర్కొన్నారు. భాజపా తీరు రాజ్యాంగ విరుద్ధమని, ప్రజాస్వామ్యాన్ని కూనీ చేశారని ఆరోపించారు.

ఇదీ చూడండి: 'వర్షంలో తడిస్తేనే రాజకీయంలో మంచి భవిష్యత్తు'