నేడూ 'అయోధ్య' విచారణతో సుప్రీం సాంప్రదాయానికి చెల్లు
రాజకీయంగా సున్నితమైన రామజన్మభూమి-బాబ్రీ మసీదు భూవివాదం కేసు విచారణతో సుప్రీం ఆనవాయితీకి తెరపడింది. ప్రతి సోమవారం, శుక్రవారం తాజా కేసులను మాత్రమే విచారణకు స్వీకరించే కోర్టు.. 3 రోజులుగా కొనసాగుతున్న అయోధ్య కేసు విచారణలో నేడూ వాదనలు విననుంది.
ఇరు వర్గాల న్యాయవాదుల అభ్యర్థనతో రోజువారీ విచారణ కొనసాగించేందుకు చీఫ్ జస్టిస్ రంజన్ గొగొయి నేతృత్వంలోని ఐదుగురు సభ్యుల ధర్మాసనం అంగీకరించింది.
సుప్రీం రాజ్యాంగ ధర్మాసనం రోజువారీ వాదనలు మంగళవారం నుంచి గురువారం వరకు మాత్రమే వింటుంది. అయోధ్య భూవివాదం కేసులో మధ్యవర్తిత్వ కమిటీ విఫలమైందన్న కారణంతో.. ఆగస్టు 6 నుంచి రోజువారీ విచారణ చేపడుతోంది కోర్టు. ఇదే తరహాలో శుక్రవారమూ నాలుగో రోజు వాదనలు విననుంది. ఫలితంగా.. ఎప్పటినుంచో వస్తున్న సాంప్రదాయాలకు తెరపడినట్లయింది.